Келшымаш урок 27 сентябрьыште таджик тӱвырам ончыктымо дене тӱҥалын. Кажне вӱргечын тудо Усталык ушем-влакын пӧртыштышт эрта.

Октябрь тылзыште Дагестан калык-влакын, азербайджан, одо тӱвыра дене палыме лийме. Изирак ончер, калыкле кухньо, тошто калык куштымаш да мурымаш, калыкле вургем гоч кажне калыкын илыш умылымашыжым, эртыше корныжым, йӱлажым пален налме.

27 октябрьыште чуваш йолташна-влак шке тӱвырашт дене палымым ыштеныт. Марий мландыш чуваш калык 200 ий ончыч, Юл эҥерым вончен, толын. Амалжат лийын: марий мланде чодыралан поян, а Юл вес могырышто чодыра шагал лийын. Тӱҥ шотышто Провой кундемеш верланеныт. Эн кугу илемыштлан Чуваш Отар ял шотлалтеш. Тыште 400 утла еҥ ила. Шке калыкыштын культурыштым, йылмыштым, йӱлаштым арален кодаш манын, ялысе тӱвыра пӧрт пелен 47 ий ончыч «Чуваш ен» ансамбльым чумыреныт. Калык лӱмым нумалше коллективым Ираида Николаевна Орлова вуйлата.

Келшымаш урокыш толшо-влаклан Чуваший нерген книга ончерым погымо. Кочкыш презентаций эртен. «Чуваш каныме кас» тӱвыра программышт моткоч поян ыле: калык куштымаш, мурымаш, тӱрлӧ модыш. Куштымаш дене мастар классыш ончаш толшо-влак рӱж ушненыт. Тыге ончет да, марий-влакын эртарыме  «Шинчымаш касс» деч нимыняр огеш ойыртемалт, эсогыл мур савыртыштыштат марийынлак йоҥга.

Иктылан нуно ӧпкелалтты: чуваш самырык тукым рушла мутланаш тырша, йылмым начар пала. «Муро-куштымаш гоч кугезе-влакнан йӱлаштым да калык ойпогыштым арален кодаш тыршена», — ансамбльын участникше палемдышт.

Келшымаш урокна умбакыже шуйна. Ончыкшым украин, татар, армян да марий тӱвыра арня-влак эрташ тӱҥалыт.

Келшымаш урок санитар да эпидемиологий нормым шуктен эртаралтеш. Куар-код тергалтеш,  ПЦР-тестым эртарыме шотышто але медицин отвод улмо справке почеш веле пураш лиеш. Организатор-влак кажнын деч маске улмым тергат, кидым санитайзер дене обработатлат. Икманаш, еҥ-влакын тазалыкыштлан лӱдыкшыдымылык лийже манын, чыла мере ышталтеш.