Диктантыш Марий Эл дене пырля Урал, Пошкырт, Татарстан кундемла гыч марий-влак ушнат. Тыгак Эстоний, Японий, Финляндий гыч марий йылмым палыше-влак акцийыш ушнаш кумылыштым ончыктеныт.
Офлайн йӧн дене Марий кугыжаныш университетысе калыкле тӱвыра да тӱвыра кокласе коммуникаций институтышто тыгай адрес дене диктантым возат: Йошкар-Ола, Кремль урем, 44 (Марий кугыжаныш университетысе УЛК, Йошкар Армий урем могырым пурыман).
Диктантым тыгак Марий Эл Республикын С.Г. Чавайн лÿмеш калыкле книгагудышто возаш лиеш. Адресше: Йошкар-Ола, Пушкин урем, 28.
Акций 10.00 шагатлан тӱҥалеш. Возышо-влак 09.00 шагат гыч 10.00 шагат марте регистрацийым эртат. Чыла мероприятий моско жап дене эртаралтеш. Россий Федерацийын регионлаштыже, тыгак вес эллаште диктантым синхронно возаш лиеш. Тидлан муниципал / тӱвыра / туныктышо тӧнежлаште диктантлан вуйын шогышо-влак деч Марий кугыжаныш университетысе калыкле тӱвыра да тӱвыра кокласе коммуникаций институтын марий йылме да сылнымут кафедрыжын электрон почто адресышкыже (markaf@marsu.ru) 2021-ше ийын, телын 6-шо кечыже марте, диктантым возаш йодмашым колтыман. Акцийыш ушнышо-влаклан диктант сераш бланк колталтеш. Возышо-влакын йодмашышт дене келшышын markaf@marsu.ru электрон почто телын 8-ше кечыштыже, 09 шагатат 45 минутлан, диктант текст колталтеш.
YouTube каналыште, тыгак кумдан кучылталтше моло социальный сетьлаште, Марий Эл Радио эфирыште, МЭТР телевиденийыште, «Акпарс» радиостудийыште вияш трансляций лиеш. Ютуб-трансляцийлан ссылке: https://youtu.be/aobk2xOnRH4.
Муниципал / тӱвыра / туныктышо тӧнежлаште диктантлан вуйын шогышо-влак возымо пашам тергаш тӱҥалыт да сеҥыше-влакым саламлат.
Чыла возышо-влаклан Марий кугыжаныш университетын сертификатшым пуат. Сертификатым налашлан оргкомитетын электрон почто адресышыкыже (markaf@marsu.ru) муниципал / тӱвыра / туныктышо тӧнежлаште диктантлан вуйын шогышо-влакым офлайн йӧн дене серыше-влакын спискыштым, тыгак онлайн йӧн дене диктантым возышо-влакын текстыштын скан але фотоштым колташ йодына. Муниципал / тӱвыра /туныктышо тӧнежлаште диктантлан вуйын шогышо-влак республике кӱкшытыштӧ эртарыме акцийын лектышыжым иктешлаш Марий кугыжаныш университетысе калыкле тӱвыра да тӱвыра кокласе коммуникаций институтын марий йылме да сылнымут кафедрын электрон почто адресышкыже (markaf@marsu.ru) 2021-ше ийын, телын 8-ше кечыштыже, 15.00 шагат марте, диктантым возышо-влакын чотыштым да сеҥыше-влакын спискыштым, тергыме диктантыштын сканыштым колтышаш улыт.
Марий Элыште «МАРЛА ЧЫН ВОЗЕНА» акцийыште сеҥыше-влакым Марий тӱвыра форумышто саламлаш тӱҥалыт. Тудо 10-шо телын Я. Эшпай лӱмеш Марий кугыжаныш филармонийыште эртаралтеш.
