Марий тиштым шымлымаште кугу надырым филологий шанче кандидат, Марий Эл Республикысе шанчын сулло пашаеҥже Олег Сергеев пыштен. Марий тӱвыра рӱдер «Шанчызым ӱжса» у проектшым Олег Арсентьевичлан пӧлекла. Кугыжаныш пайрем кечын Марий тӱвыра форумым эртарыме кышкарыште мероприятий эрта. Марий возыктышын эртыкше да кызытыше вияҥме корныжо нерген шукырак пален налаш кумылан-влакым проектын пашашке ушнаш ӱжына. Тышке толшо-влак шанчызын илыш корныжым шергалыт, тений савыктен лукмо «Язык памятников письменности марийского края (конец ХVII- ХVIII вв)» книга нерген автор дене вашмутланымашке ушнат. Мероприятий Марий кугыжаныш филармонийын автовый залыштыже эрта. 11.30 шагатлан тӱҥалеш.

Пандемийлан кӧра санитарно-эпидемиологий лӱдыкшӧ ынже лий манын, мероприятийыш пураш QR-код, ПЦР-справке але метотвод улмо шотышто справке лийшаш.