8-ше числаште «Марла чын возена» диктантыш марий калык илыман Российысе икмыняр регионышто да кугу олаште, Эстонийыште, Финляндийыште да Японийыште илыше-влак ушненыт.

9 декабрьыште В.М. Васильев лӱмеш Йылмым, литературым да историйым шымлыше шанче марий институт «Марий лексикологийын кызытсе жаплан кӱлешан йодышыжо-влак» шанче-практик семинарым эртара.

10 декабрьыште Марий тӱвыра форум тӱрлӧ сынан лу мероприятийым уша. Эр гыч кас марте тӱрлӧ площадкыште сылнымут мастар, туныктышо, тӱвыра пашаеҥ, мер ушем-влак мероприятийлаште лийыт.

Марий тиштын, возыктышын вияҥаш тӱҥалмыже да вияҥмыже, йылмым туныктымо да тунемме нерген мутланаш, ончыл пашаеҥ-влакын паша опытышт дене палыме лийыт. Тыгак марла лекше «Кугарня» ден «Ончыко» журналын лӱмгечыштым палемдат. Россий Писатель-влак ушемын йыжъеҥже З.М. Дудина дене вашлиймаш. «Юмынӱдыр огеш пу вашмутым» театрал-сылнымут книгажым презентоватла.«Мунло» уш-акыл модмаш 6 командым уша.

18.30 шагатлан пайрем концерт тӱҥалеш. Тудым марий кугыжаныш филармоний пеленысе А.Искандаров лӱмеш капелле, П. Тойдемар лӱмеш муро театр, «Марий Эл» кугыжаныш куштышо ансамбль, посна мурызо-влак сӧрастарат.

Концерт жапыште ончыч да пайрем кечын эртарыме конкурс-влакым иктешлат. «Мунло» уш-акыл модмаште, «Марла чын возена» диктантым эн сай возышо-влакым саламлаш тӱҥалыт. Тыгак 2021 ийыште «Ӱдырсий» регион-влак кокласе вашӱчашыште сеҥыше-влакын лӱмыштым пален налына. Марий йылмым эн сайын туныктышо-влакын лӱмыштымат тыштак колына.

Пайрем дене!