Ныл эл да шым регион марий диктантыш ушнен
Ончычсо ийласе семынак кугыжаныш пайремым «Марла чын возена» диктант дене почмо. Индешымше гана эртыше акцийыш 2500 утла еҥ ушнен, 180 площадке пашам ыштен. Тиде школ тунемше, туныктышо, методист, воспитатель, студент, шанче, тӱвыра пашаеҥ, журналист, кугыжаныш да муниципал служащий да шке шинчымашым тергаш кумылан-влак ушненыт. Тений икымше гана диктантым мӧҥгыштат, паша верыштат онлайн йӧн дене возаш лийын. «МЭТР» телеканал, «Марий Эл радио» вияш эфир гоч текстым лудыныт. Санденак акцийыш Австрийыште, Финляндийыште, Эстонийыште, эсогыл Японийыште, тыгак Российыште марий-влакын тӱшкан илыме кундемлаште – Татарстан, Пошкырт, Киров, Саратов, Урал, Одо кундемлаште – ушненыт. Текстым марла да курыкмарла лудмо. Нунын коклаште Марий тӱвыра директор, Марий Эл Республикын Кугыжаныш погынжын депутатше Наталья Пушкина лийын. Тудо кугезе тукымжын йылме ойыртемыжым да возымо правил-влакым палымыжым сайын ончыктен, икымше вер дене палемдалтын.
9 декабрьыште В.М. Васильев лӱмеш Йылмым, литературым да историйым шымлыше шанче марий институт «Марий лексикологийын кызытсе жаплан кӱлешан йодышыжо-влак» шанче-практик семинар эртарен.
Кажне мероприятий калыкнан чон поянлыкше нерген
10 декабрьыште Марий кугыжаныш филармонийыште марий поэтессе, Россий Писатель-влак ушемын йыжъеҥже З.М. Дудина дене вашлиймаш. «Юмынӱдыр огеш пу вашмутым» театрал-сылнымут ойпогыжо йыр вашмутланымаш кугу тӱшка калыкым ушен. Самырык-влаклан «Кугарня» газетым лукташ тӱҥалмылан 30 ий, «Ончыко» сылнымут да мер-политик журналлан 95 ий темме лӱмеш пайрем сынан мероприятий-влак писатель ден поэт, студент ден туныктышо-влакым ушен. Тушто марла изданий-влакын марий йылме да сылнымут, калык йӱла да мер илыш деке шӱмаҥдымаште надырышт нерген каласкалыме. Палемденак кодыман, пайрем мероприятийыште кум писатель-поэтлан Россий писатель ушемыш пуртымо нерген таныкым кучыктымо. Иктыже – «Ончыко» журналын тӱҥ редакторжо Игорь Попов.
Марий тӱвыра рӱдерын марий йылмым электрон йӧн дене вияҥдаш тӱрлӧ проектыш ушнымыжо да тудым йылмым туныктымаште да тунеммаште кучылтмо пайдалыкше нерген каласкалыме. Мутат уке, тиде площадке тӱҥ шотышто школлаште йылмым туныктышо-влакым ушен, молан манаш гын, нуно электрон туныктымо ресурсым ыштымаште шкештат кугу надырым пыштат. Марий тиште кечын Шочмо йылмым туныктышо-влакын Марий Эл Республикысе Ассоциацийын Советшын кумдаҥдыме заседанийже годым эн сай ЭОР-ым ямдылыше туныктышо-влакым палемдыме, нунышт шке пашашт дене колллегышт-влакым палареныт.
Марий тӱвыра рӱдерын «Шанчызым ӱжса» у проектше филологий шанче кандидат, Марий Эл Республикысе шанчын сулло пашаеҥже Олег Сергеевлан пӧлеклалтын. Марий возыктышын эртыкше да кызыт вияҥме корныжо нерген шукырак пален налаш кумылан-влак тушко ушненыт, «Язык памятников письменности марийского края (конец ХVII- ХVIII вв)» книган содержанийже дене палыме лийыныт.
«Серызе» команде «Мунлон» кугу призшым сеҥен
«Мунло» уш-акыл марафоныш тений шым команде ушнен. Командым марий меръеҥ, журналист, районласе туныктышо ден тӱвыра пашаеҥ-влак чумыреныт. Модмаш кум тур дене эртен. Йодыш-влак марий йылме, сылнымут да йӱла дене кылдалтше лийыныт.
«Мунло» модмашын кубокшым да гран-прим республикысе марий свыктышлаште тыршыше журналист-влакын « Серызе» командышт сеҥен налын. Икымше верыш Морко районысо марий туныктышо-влакын «Чолпан» командышт лектын. «Писатель» команде коккымшо, Куженер районын «Чумбылат» командыже кумшо верыш лектын. Марий Турек районын Йошкар-Оласе землячествыжын «Ӱжара», Куженер район Руш Шой школын «Одар тукым» да Йошкар-Олаште илыше-влакын «Вий» командыштым посна номинацийыште палемдыме.
Пайрем кугу концерт дене мучашлалтын. Тудым Марий кугыжаныш филармоний пеленсе А. Искандаров лӱмеш капелле, П. Тойдемар лӱмеш театр, «Марий Эл» кугыжаныш куштымо ансамбль, посна мурызо-влак сӧрастареныт.
Концерт жапыште ончыч да пайрем кечын эртарыме конкурс-влакым иктешлыме. Зал тич погынышо калыкым Марий Эл Республикын Виктер Вуйлатышын икымше алмаштышыже Михаил Васютин, Тӱвыра, печать да калык-влакын пашашт шотышто министр Константин Иванов, Туныктыш да шанче министр Лариса Ревуцкая саламленыт.
Мероприятийыш QR-код, ПЦР-справке але метотвод улмо шотышто справке дене пуртымо.
