Пайремым кугарнян палемденыт, чийышаш вургемым, кочшаш-йӱшаш йӧрварым ямдылыме, такмакым палыме, куштен моштымо гоч еш дене илаш кӱын шумыштым почыныт. Ӱдыр пучым пуалтен колтымо дене «Мый ямде улам» манын шижтарен. Тидын нерген пайремын логотипше гоч ужына. Тудым Россий художник ушемын йыжъеҥже, кугезе йӱлам сайын палыше да тудым сӱретыш образ гоч пыштен моштышо Иван Ямбердов ямдылен.
Таче «Ӱдырсий» пайрем сценический шӱлыш дене ила. Но тыгодым шот-рат огеш шеҥгешт, мӧҥгешла, у сыным налын, вияҥеш. Эртарыме кечыжат ожнысе семынак кугарня лийын.
Чын, тенийсе саманлан кӧра марий ӱдырын пайремжым кок семын эртарыме: видеопрограмме полшымо дене кум тапырлан войзыш-влакым ямдылыме, а сеҥыше-влакым палемдыме тат шинчаваш ончен эртен.
Тений Российын ныл регионжо: Марий Эл да Татарстан республикыла, Урал кундем да Моско ола – гыч 13 ӱдыр ушнен. Кажныже улыт калыкын чинче падырашыже, ончыклыкнам волгалтарыше, еш илышым кугезе коча-кованан шинчаж гоч ужын моштышо. «Мый марий ӱдыр улам» тапырыште шкешт нерген тачысе илышым аклен ойленыт гын, марий тошто шоя (легенде) негызеш театр модмашым, марий калык вуйчиемым ончыктымо годым кугезына-влакын образыш пуреныт: тоштыеҥ шоялан келшыше вургем, вуйчиемлан келшыше йолчием кӱлын. Кундемын ойыртемжым шотыш налме.
Усталык да моторлык вашӱчашыш шке вийыштым тергеныт да тыгай сеҥымашке шуыныт:
Кугу приз – Капитонова Мария, Курыкмарий районысо Шиндыръял тӱвыра пӧрт;
1 вер – Иванова Наталья, Юлсер кундемысе Эмеково ял шотан администраций;
2 вер – Егорова Алина, Озаҥ оласе марий-влакын калыкле-тӱвыра автономий;
3 вер – Усова Эльмира, Советский район Кужмара ялысе тӱвыра порт;
Интернет ӱдыр – Медведева Диана, Звенигово районысо Эсмекплак тӱвыра да каныме рӱдер;
Йӱлам палыше – Кутасова Надежда, Звенигово район Какшамарий тӱвыра да каныме рӱдер;
Семалче – Тимиряева Мария, Оршанке районысо Рӱдӧ клуб системе;
Пампалче – Актуганова Екатерина, Марий кугыжаныш университет;
Кумылналше – Горохова Юлия, Куженер районысо Старсела ялысе тӱвыра пӧрт;
Тыматле – Маркова Анна, Звенигово районысо Эсмекплак тӱвыра да каныме рӱдер;
Усталче – Афросина Анастасия, Свердловск область Красноуфимск районысо Сарсаде ялысе тӱвыра пӧрт;
Йӱксӱдыр – Ябекова Наталья, Свердловск областьысе Марий-влакын регионысо калыкле-тӱвыра автономийже;
Ӱшанче – Меньшикова Виктория, Моско марий тӱвыра рӱдер.
«Ӱдырсий-2021» регион-влак коклаште сеҥышыш лекше Мария Капитонова Чебоксар олаште Республикысе тӱвыра колледжыште тунемеш. Изиже годсек тӱвыра аланыште пӧрдеш: ешыже марий культурым калык коклаште шарымаште тырша. Мария – уста куштызо, баян да балалайке дене шокташ йӧрата.
«Ӱдырсий» конкурс нерген школышто тунеммем годымак колынам ыле, но толаш ӧрмалгышым, – каласыш Мария. – Кумылем Руслан изамын «Марий патыр» конкурсышто лиймыже нӧлтале. Тунам тудо «Шындыр» фольклор ансамбльын полшымыж дене мемнан велне «Армийыш ужатымаш» йӱлам кузе эртарыме дене палдарыш.
Мыланна, самырык тукымлан, тыгай вашӱчаш-влак кӱлыт: эн ончыч тудо мыланна шочмо йылмынам тунемаш, йӱлам палаш тарата. Тиде у вашлиймаш, палыме лиймаш.
Справке: Куд ий коклаште «Ӱдырсий» вашӱчашыш вич регион да Марий Эл гыч индеш район гыч 53 ӱдыр ушнен.
Конкурсын организаторжо – «Российысе марий-влакын федерал калыкле-тӱвыра автономийже» мер организаций. Тудым Калык-влакын пашашт шотышто федерал агенствын субсидийым сеҥен налме шийвундо дене эртарыме.
Ӱдыр-влакын конкурс пашаштым https://vk.com/marityvraryder соцкылыште ончаш лиеш.
Раисия Николаева.
