Заседанийым Советын председательже, калык-влакын пашашт шотышто Россий Президент пеленысе Советын йыжъенже Лариса Яковлева почын да мер организацийын пашажым кугыжаныш национальный политике кышкарыште вияҥ толмыж нерген, мер пашаште кугыжаныш да верысе кучем дене икойыш толын ышташ, проект паша гоч мер илышым у кӱкшытыш нӧлталаш кӱлмым палемден.
Марий-влакын федерал калыкле-тӱвыра автономий йылмым, калыкын культурыжым, Российысе калык-влак кокласе кылым вияҥдымаште кумылын тырша. ФАДН-ын субсидийжым конкурс гоч сеҥен налын, 2020 да 2021 ийлаште тӱрлӧ шӧрынан да кӱкшытан мероприятий-влакым Марий Элыштат, марий-влак илыман вес кундемлаштат эртарыме. Тидын нерген ФНКА-н исполнительный директоржо Наталья Пушкина палдарен.
Эртыше идалыкыште ышталтше паша да 2022 ийлан палемдыме мероприятий-влак нерген регионласе да верыме мер организаций-влакын вуйлатыше-влак каласкаленыт. Татарстан кундемыште эн кугу событий семын регион-влак кокласе «Семык» пайремым, Одо кундемыште «Удмурт кенеш» мер ушем дене пырля финн-угор самырык тукымын форумыштым, Пошкырт велне «Мотивы финно-угории» фестивальым да Самырык тукым слетым палемден кодыман. Урал марий-влак Ага пайремым, «Йылме, тӱвыра, религий» форумым эртарат. Ленинград областьыште, верысе кучем дене икойыш толын, чуваш ден марий-влак «Акатуйым» да «Пеледыш пайремым» фестиваль семын пырля эртарат.
Марий-влакын федерал калыкле-тӱвыра автономийже регион да верысе кӱкшытан НКА-м почмо йодышымат шинчаончылныжо куча. 2021 ийыште Башкортостан республикыште да Свердловск областьыште регионысо мер организацийым почмо, Москва олаште верысе кӱкшытан калыкле-тӱвыра автономий пашам икымше кече гычат кумылын шукта, Моско велне илыше марий-влакым шке йырже чумыра.
Заседанийыште ФНКА-н составыш Башкортостан республикысе «Эрвел марий» да Свердловск областьысее региональный мер организаций-влакым икой дене пуртымо, а нунын вуйлатышыштым – Виталий Ялаевым да Наталья Ябековам – Советыш сайлыме.
