Марий Эл гыч тушко рӱдерын пашаеҥже, марий поэт, музыканче, фольклор коллектив-влак ушненыт. Севастополь олам теҥыз серысе олаште илыше марий-влак, тыгак крым-татар, чуваш, руш, гагауз, немыч, белорус общинын еҥже-шамыч лийыныт.

Мероприятийым Марий Эл велым рӱдерын вуйлатышыже Наталья Пушкина вӱден, а Севастополь могырым – «Элнет» марий тӱвыра автономийым вуйлатышын алмаштышыже Роза Садовина.

Видео-кӱварым «Чон оҥгыр» фольклор ансамбль марий калык муро дене почын. Телевизор вес могырышто улшо-влак марий да вес калыкын енышт марий сем почеш кушталтеныт. Вет нунылан марий тӱвыран ойыртемжым, йылме поянлыкшым аклаш йӧным ыштыме: марий калыкле вургем дене палдарыме. Калык муро поянлыкше дене гармоньчо-влак Сергей Пакеев, И. Палантай лӱмеш Тӱвыра да сымыктыш колледжын студентше-влак Айнур Хамидуллин ден Саша Коновалов палдареныт. «Падыраш» йоча ансамбльын изи тӱмырзыжӧ-влакым, совым кырен, телевизор ваштареш шогалын тавалтен вашлийме. Марий поэт-влак Альбертина Иванова ден Геннадий Сабанцев шке почеламутыштым марий да руш йылме дене йоҥгалтареныт.

Видео-кӱварым «Празднуем вместе» ансамбльын йоҥгалтарыме мурышт дене мучашлыме. Тиде ансамбльыш Севастополь олаште пашам ыштыше тӱрлӧ калыкын еҥыштым ушымо, нунын коклаште марий-влакат улыт.

«Тыгай онлайн-вашлиймаш гоч землякна-влакын илышышт да мер пашашт нерген шукырак пален налаш, мер пашам виктарымаште кучем дене кылым пеҥгыдемдаш полышым ышта. Мероприятийым «Марий йӱла» тӱвыра-сотемдарыш марафон кышкарыште эртарышна.» – палемдыш рӱдерым вуйлатыше Наталья Пушкина.