Марафон тунемше-влакым телым эртарыме модыш-влак дене палдарен. Йоча-влак шӱшкан ече, маскайол дене ӱчашен мунчалтеныт, вӱдвара дене луман ведрам нумалын таҥасеныт, салмавондо дене мелнам «нумалыныт».
Квест-модышышто йоча-влак марий йӱла пайремым, туштым, марий семӱзгарым палымыштым ончыктеныт. Варажым Марий тӱвыра рӱдерын войзымо «Кугече» видеофильмым онченыт.
Мероприятийыште Марий тӱвыра рӱдерым вуйлатыше, Кугыжаныш Погынын депутатше Наталья Пушкина Российысе калыкын тӱвыра поянлык идылыкше да «Тунемше-влаклан тӱвыра» проект кышкарыште рӱдерын эртарыме пашаже, лийшаш мероприятий-влак дене палдарен.
Пӧтъял кыдалаш школын директоржо Валериян Семенов йоча-влаклан шочмо кундемысе ял калыкын ожно пайремым эртарыме радам нерген каласкален.
Кугу Порат школ директорын пашажым шуктышо Валентина Гордеева марий кумылан йоча-влакым ончен куштымаште тыгай мероприятий-влакын кӱлешлыкше нерген ойлен. Варажым школ да рӱдерым вуйлатыше-влак пашам келшен ыштыме шотышто соглашенийым пеҥгыдемденыт.
Рӱдерын пашаеҥже-влак Эльвира Петрова ден Валерий Чиванов, гармоньым шокталтен, тӱмырым пералтен, марий калык мурым сылнын йоҥгалтареныт.
Палемдыман, «Марий йӱла» тӱвыра-сотемдарыш марафоныш школлаште тунемше-влак деч посна лудмывер, калыкле-тӱвыра автономийын еҥже-влакат ушненыт. Тений тудо Медведево районысо Руш Кукмор кыдалаш школышто, Йошкар-Оласе 14-ше номеран гимназийыште, Йошкар-Оласе Рӱдӧ лудмыверыште эртен. Онлайн йӧн дене Севастополь оласе Марий мер ушемын да вес калыкын еҥже-влаклан марий йӱла, калык мур, чием, семӱзгар нерген каласкалыме.
«Марий ӥӱла» марафон умбакыже шуйна. Ӱшанена, коча-кована деч саклен кодымо тӱвыра да йылме поянлыкнам самырык тукымлан арален кодымаште тудын негызше пеҥгыде лиеш.
