Мероприятий Йоча-влакын тӱнямбал кечыжлан Россий калыкын тӱвыра поянлык идалыкшылан пӧлеклалтын.
Тушко «Пеледше тукым», «Сеҥымаш корно дене», «Элем, тылат мурем» республикысе онлайн-вашӱчашлаште сеҥыше-влакым, мер илышыште чолга ӱдыр-рвезе-влакым ӱжмӧ.
Пайрем программе йоча-влакым кумылаҥдыше лиеш. Модыш аланыш марий калык йомакын геройжо-влак весела вашӱчашым, калык модышым эртарат. Шовыноҥ шоушто шовын куполыш пураш, шоҥ дене модаш лиеш.
«Юзо эл» пайрем концертыште йоча конкурслаште сеҥыше-влак шке мастарлыкыштым ончыктат. Медведево, Оршанке, Шернур, Волжский, Советский, У Торъял, Марий Турек, Звенигово, Куженер, Параньга районла гыч йочасадлаш да школлаште изирак класслаште тунемше-влак тӱшкан але шкетын мурым муралтат, кушталтен пуат. Коклаштышт ик гармоньчо лиеш – тиде Арбор школын тунемшыже Ростислав Васинкин.
Пайремыш толшо йоча-влакым Марий тӱвыра рӱдер пеленысе «Падыраш», Калык усталык да культурканыш паша шотышто шанче-методик рӱдерын «Солнышко» йоча эстраде куштышо ансамбльже-влак, марий мурызо Володя Матвеев муро да куштымашышт дене куандарат.
