Тӱрлӧ мероприятий, лӱмлӧ еҥ дене вашлиймаш, «йыргешке ӱстел» воктене мутланымаш-влак пайдале да кӱлешан лийыныт.
Мутлан, икымше кечын участник-шамычлан «Кандагар» фильмым ончыктеныт. Чын лийше историй негызеш войзымо фильмын тӱҥ геройжын прототипше, Владимир Шарпатов, шкеак толын. Российын Геройжо Владимир Ильич дене вашлиймаш пеш пайдалын эртен, вет 1995 ийыште Афганистаныште пленыш логалше гражданский самолётын экипаж командирже лачак тудо лийын. «Российысе кажне Герой нерген тыгай фильм лийшаш!» – манын тудо. Моло кечылаштат шерге уна участник-влак дене вашлийын, лекше йодышыштлан вашештен, самырык-шамычлан кӱлешан ой-каҥашым пуэн. Шижалте, тул-вӱд вошт эртыше землякнам (Звенигово район Красногорск посёлкышто) тачысе саманыште эртыше ситуаций, ончыкылык патырна-влакын пӱрымашышт тургыжландара. «Огеш мондалт ниможат, но ме ончыкылык волгыдо, пиалан илышлан ӱшанена», – мане Владимир Шарпатов.
Элнан ӱшанле икшывыже лияш
Теве жапше годым спецвойскаште служитлыше, «Сильная Россия» общероссийский толкынын кӱшыл советшын еҥже, «Офицеры России» общероссийский организацийын патриотический воспитаний шотышто советшын вуйлатышыжын алмаштышыже, мер пашаеҥ, тале спортсмен Иван Мечишев дене пырля 22 августышто «Сильнейшая нация» самырык-влакын акцийышкышт ушнаш йӧн лекте. Самырык тукымым духовно пойдарыме да патриотизм шӱлышеш воспитатлыме нерген поро мутланымаш пайдалын эртыш. И.Мечишев службым эртымыж, тудын пайдаж нерген моткоч оҥайын каласкалыш. Тыгак спортын тӱрлӧ видышкыже кузе ушнымо да тиде але тудо видын кӱлешлыкше дене палдарыш. Варажым участник-шамычлан вий-куатым тергыме спорт дене мастер-классым ончыктыш. Тушкат уна-влак кумылын ушнышт.
Тыгай оҥай да пайдале вашмутланымаш уна-шамычланат шуко жаплан поро шарнымашым кода, шонем.
Ик ой дене, ваш келшен…
А теве тӱрлӧ национальностян калыкын еҥже-шамыч дене «йыргешке ӱстел воктене» мутланымаш, каҥашымаш пайдалыкше да ыштышаш паша планже, ончыкылык ӱшаным пуымыж дене шерге. Тудо йоча да самырык-влаклан калык кокласе патриотизм шӱлышан икымше слётым эртарыме дене келыштаралтын.
Тушто Федеральный калыкле тӱвыра автономийын вуйлатышыже, РФ президент пеленсе калык-влак кокласе кыл шотышто советын членже, Марий Эл Кугыжаныш Погын вуйлатышын алмаштышыже Лариса Яковлева, Марий Эл правительстве председательын икымше алмаштышыже Михаил Васютин да молат выступатленыт.
Тӱрлӧ калыкын йӱлаж да тӱвыраж дене келыштаралтше икмыняр изи выставкат лишкырак палыме лияш сымыстарен. Уремеш келыштарыме сценыште, ойыртемалтше костюмым чиен, тӱрлӧ йоча ансамбль шке художественный номерже дене куандарен.
Теве тыге тӱрлӧ йылме дене мутланыше ӱдыр-рвезе-влак иктеш чумырген, экологический, интеллектуальный модмашке, тренинглашке ушненыт. Тидымат вес калыкын тӱвыра ден йӱлажым арален кодымаште, икте-весым пагален илымаште сай ошкыл семын палемдыман. Тукым гыч тукымыш шуяш тӱҥалына гын веле йылмына ден йӱлана умбакыже вияҥыт.
Российын вийжым ончыктышо символ
«Лесная сказка» каныме верыште йоча да самырык-влаклан слётын участникше-шамычым РФ кугыжаныш флагын кечыж дене саламлаш Марий Эл вуйлатыше Юрий Зайцев толын.
– Кугыжаныш флаг – Российын курымашлык чапшым да вийжым ончыктышо символжо. Сеҥыше боецна, элнан чапшым аралыше спортсмен-влак, шанче, тӱвыра да искусство аланыште тыршыше-шамыч элнан тистыжым нӧлталыт. Тачысе кечын йӱлышӧ шинчан самырык тукымын элнан гимнжым мурымыжо куандара. Шергакан йолташ-влак, тыланда ме ӱшанена. Тендам пайрем дене саламлем да пеҥгыде тазалыкым, пиалым тыланем. Тек Россий тисте кумда элна ӱмбалне лойгалтеш, – мане регион вуйлатыше.
Тыгай мероприятий кушкын толшо тукымлан пайдале. Тиде символ мемнам уша, патриотизм шӱлышым пурта.
Марий-влаклан федеральный калыкле-тӱвыра автономийыштым вуйлатыше, РФ президент пеленысе калык-влак кокласе кыл шотышто советын еҥже, Лариса Яковлева «Лесная сказка» каныме верым арален кодымыжлан Юрий Викторовичлан тауштыш.
– Российыште эн шерге – тӱрлӧ национальностян калыкын пашам ыштен, ешым чумырен, йоча-влакым куштен ик ой дене илымыже. Мемнан форумыш ушнымыланда моткоч кугу тау. «Лесная сказка» лагерьыште тек эре йоча-шамычын воштылмо йӱкышт йоҥга, ӱдыр-рвезе-влак тӱрлӧ йылме дене мурым мурат, – каласыш Лариса Николаевна.
Слётын программыже Марий Элыште илыше тӱрлӧ национальностян йоча да самырык-шамыч кокласе кылым вияҥдыме, калыкле тӱвырам, йӱлам шарыме дене кылдалтын.
Регион вуйлатыше лагерь кумдыкым, комплексысе пӧлемлаште олмыктымо пашам ончен лектын.
Марий Эл Образований да науко министр Лариса Ревуцкая тиде йоча лагерьыш путёвкым налаш кумылан еҥ тений шуко лийын манын палемдыш. Проект почеш ты каныме да тазаҥдыме верысе санаторийыш ик сменыште 80 еҥым, а йоча лагерьыш 220 ӱдыр-рвезым вераҥдаш лийме нерген палдарен.
Кеҥеж гоч тушто 1200 йоча канен кертеш.
Тачысе кечылан йоча ден самырык-влакын моштымашышт ден усталыкыштым пален налме да вияҥдаш полшышо «Волгенче» рӱдерын корпусшо умбакыже чоҥалтеш.
Ты слёт Марий Элыште илыше лу тӱрлӧ йылме дене мутланыше шӱдӧ наре еҥым чумырен.
Елена Эшкинина.
