Кужу илыш корнышт нунын тӧрсыран, чодыра йолгорно гай кадыргалше лийын гынат, ончыко каяш, шочшо-уныка-влаклан чын корныш лекташ поро ой-каҥаш денат, паша денат полшеныт да полшат. Поян илыш корнышт тачысе да эрласе кечым волгыдо шинчаончалтыш дене аклаш туныктат. Шочмо йылмынам, курым гыч курымыш аралалт кодшо йӱланам, тӱвыранам арален кодымаште нунын надырышт кугу манме чын дечат чын. Ончалза: фольклор ансамбль-влакын рӱдышт кӧмыт улыт?

Нуно, пагалыме ший ийготым вачӱмбак пыштыше мудречна-влак! Тачысе пайремышт дене шокшын-шокшын саламлена да пеҥгыде тазалыкым, кужу ӱмырым тыланена. Тек вуй ӱмбалныда чевер кече шырата, шочшо-уныкада-влакын йӧратымашышт кумылдам нӧлта.