8 Март – Тӱнямбал ӱдырамаш кече. Тиде кечын каныме «Марий касат» шошо пайремлан пӧлеклалтеш. Тудым Республикысе марий тӱвыра рӱдер эртара. Пайрем кас 15 шагатлан Ленин лӱмеш тӱвыра полатыште тӱҥалеш.
Ныжыл ӱдырамаш-влакым пӧръеҥ-влак саламлаш тӱҥалыт. Нунылан эн йӧратыме марий муро-влак йоҥгалтыт. Программын тӱҥ унаже – палыме марий бард, Марий тӱвыра рӱдер пелен «У муро» эстраде клубын художественный вуйлатышыже Геннадий Григорьев. Тудо гитара почеш мотор муро-влакым пӧлекла.
«Марий касыш» йӧратыме да лишыл еҥда-влак дене пырля толза.
