«Угинде» еш пайремым ятыр марий ешыште кызытат эртарат. Республикысе марий тӱвыра рӱдер тиде йӱлам марий-влак илыман кундемлаште арален да щарен шогымо шотышто кугу сомылым виктарен шога. Посна мероприятий семын калык пайрем 2014 ий гыч эртаралтеш.
Чарла Кремльыште пайремлан тӱҥалтышым пакча-саскам, шыл-шӧрым, мӱйым да моло йӧрварым ужалыме ярминга лиеш. Тушко ялозанлык предприятий, фермер да шке озанлык-влак сатуштым кондат. Тыгак киндым пыштыше предприятий-влак кочкыш сатуштым ужалаш тӱҥалыт.
Тӱҥ сценыште пайрем «Авын мелна» йӱла дене почылтеш. Тудым Провой кундем Исменца тӱвыра пӧрт пеленысе «Олык сем» калык ансамбль модын ончыкта. Онаеҥ-влак Юмылан киндым, моло саскам сайын шочыктымылан тауштымо шомакым пелештат, толшо калыклан тазалыкым, перкелыкым Юмо деч йодыт.
«Угинде» пайремлан кажне суртышто киндым пыштыме. Могай рецепт почеш тудым ямдылыме? Очыни, кажне ешын шке секретше лийын, молан манаш гын, киндын кузе оварымыж гычат ешын идалыкым илен лекмыже рашемдалтын. Лач тидым «Кинде уло – муро лиеш» онлайн-таҥас ончыкта. Палемдыман, тушко 7 озавате да йоча-влак ушненыт. Тиде – Лидия Егоровна Кузнецова Лидия Егоровна (Оршанке район Чирки тӱвыра пӧрт), Надежда Ибаевна Терехова (У Торъял район Немда тӱвыра пӧрт), Галина Николаевна
Жилкина (Куженер район Верхушут тӱвыра пӧрт), Юлсер кундем Карай тӱвыра пӧртын калык театрже, Морко районысо Изи Кугунур тӱвыра пӧртын «Ӱшӱт сем» фольклор ансамбльже, Текуса Вячеславовна Васюкова (Курыкмарий район Юлъял тӱвыра пӧрт), Татьяна Ивановна Васильева (Провой кундемысе Чакмарий тӱвыра пӧрт) да Юлсер кундем Помар кыдалаш школын тунемшыже-влак Александрова Ульяна, Тихонова Карина, Чернова Ольга, Шулепова Анастасия.
Юлсер кундемысе «Шийгорно» (Карай ял), Провой кундемысе «Олык сем» калык (Исменца села), Оршанке район гыч «Кӱдыроҥгыр» (Лужбеляк ял), Медведево кундем гыч «Муро аршаш» (Шойбулак поселко), Йошкар-Ола гыч «Пеледыш» калык, «Чон оҥгыр», «Падыраш» фольклор ансамбль-влак мурызо Вадим Краснов, Снежана Орлова, Виталий Кучергин «Муро сий» концертым сӧрастарат.
Пайрем марий калык модыш-влаклан поян лиеш. Тушто шке чолгалыкыштым кугыеҥ ден йоча-влак ончыктен сеҥат. Калык мастар Виталий Кудрявцев кидвакш дене ложашым шоктмо шотышто мастар классым эртара, пырчым кырыме, пуалтарыме ӱзгар-влак дене палдараш тӱналеш.
Республикысе марий тӱвыра рӱдер, Марий Эл Республикын Тӱвыра, печать да калык-влакын пашашт шотышто министерствыжын да Ял озанлык да кочкыш шотышто министерствыжын полшымышт дене«Угинде» республикысе пайремым эртара.
