Викторинылан вашмутым mari-centr_konkurs@mail.ru але рӱдерын «вконтакте» соцкылыш (https://vk.com/marityvraryder) сообщений дене колташ лиеш.
Вашмутым 20 октябрь 17 шагат марте налына. 21-ше кечынже викториныште сеҥышым палемдена. Пӧлек – чатка шондык.
20 октябрьыште Марий кугыжаныш университетын лудмо залыштыже «Родо тукым улына» сылнымут-сылнысем унагудо эртаралтеш. Унагудыш марий поэт-влак Альбертина Ивановам, Геннадий Сабанцев-Оярым, Зоя Дудинам толыт. Нуно финн-угор поэт-влакын марлаш кусарыме почеламутышт дене палдарат. Гармоньчо Эльвира Петрова финн да мордва калык муро-влакым йоҥгалтара, коми йылме гыч марлаш кусарыме почеламут негызеш возымо шке мурыжым Геннадий Григорьев пӧлекла.
21 октябрьыште МарНИИЯЛИ-ште «Современная литература народов России. Публицистика» антологийын презентацийже лиеш. Марий Эл книгаште калык поэт Иван Горныйын, драматург Россий писатель ушемын йыжъеҥже Александр Петровын, тӱвыра да сымыктыш кафедрын профессоржо, сымыктыш шанче докторжо Галина Шкалинан, «Кугарня» газетын корреспондентше, самырык автор Татьяна Попован пашаштым пуртымо.
Ончылмутым марий йылме да сылнымут кафедрын доцентше, филологий шанче кандидат Галина Бояринова ден филологий шанче кандидат, Российын писатель ушемын йыжъеҥже Надежда Федосеева возеныт.
Мероприятий жапыште тыгак Марий книга савыктышын, Марий Элысе писатель ушемын лукмо книгашт дене палдараш тӱҥалыт.
Россий Федерацийын культурыжын сулло пашаеҥже, Россий писатель ушемын йыжъеҥже, Коми Республикын калык писательже Алексей Вячеславович Попов (Висер Ӧль) дене вашлиймаш эрта.
Мероприятий МарНИИЯЛИ-н конференц-залыштыже эрта. Тудым Марий тӱвыра рӱдер, Марий книга савыктыш да Марий Элысе писатель ушем дене пырля эртара.
22 октябрьыште Коми Республикын калык писательже Алексей Вячеславович Попов (Висер Ӧль) дене вашлиймаш марий поэт да киноартист Йыван Кырлан шочмо, Шернур, кундемыштыже эрта.
