«Авын мелна» самырык жапыш пӧртылтен
Пайремлан тӱҥалтышым пакча-саскам, шыл-шӧрым, мӱйым да моло йӧрварым ужалыме ярминга лиеш. Тушко Марий Эл, Чуваший да Виче кундем гыч гыч ялозанлык предприятий, фермер да шке озанлык-влак сатуштым кондент. Тыгак Йошкар-Оласе да Килемар кундем гыч киндым пыштыше предприятий-влак кочкыш сатуштым ужалаш конденыт.
Пайремым «Авын мелна» йӱла почын. Тудым Провой кундем Исменца тӱвыра пӧрт пеленысе «Олык сем» калык ансамбль ончыктен. Спектакль сынан композицийым погынышо калык, а лийынытше 1200 утла еҥ, ик шӱлыш дене ончен, шоҥгыракше йоча да самырык пагытыш пӧртылын, ял калык дене пырля уржа-сорла жапыште пасушто, идымыште тыршымыжым порын шарналтен.
«Авын мелналан» сай ешартыш семын 150-200 утла ий ончыч пырчым ӱдымӧ – шурным погымо, ложашыш да шӱрашыш савырыме, киндым пыштыме да ешлан тазалыкым йодмо марте кучылталтше арвер-влакын ончерышт да нуным кунам да кузе кучылтмым ончыктымаш эн чотшо йоча-влаклан келшен.
Марий Юмыйӱлан Йошкар-Оласе ушемын тӱҥ онаеҥже Юрий Тушнурцев Юмылан киндым, моло саскам сайын шочыктымылан тауштымо шомакым пелештен, толшо калыклан тазалыкым, перкелыкым Юмо деч йодын.
«Кинде уло – муро лиеш» онлайн-таҥасын лектышыже
«Угинде» пайремлан кажне суртышто киндым пыштыме. Могай рецепт почеш тудым ямдылыме. Лач тидым «Кинде уло – муро лиеш» онлайн-таҥас ончыктен. Чылаже кандаш видеопаша пурен.
Сеҥыше радамыш лектыныт:
I вер – Юлсер кундемысе Карай ялысе рӱдӧ тӱвыра пӧрт пеленысе калык театрже (вуйлатыше Васильева Надежда Николаевна);
II вер – Жилкина Галина Николаевна, Куженер районысо Старсела ялысе тӱвыра пӧрт;
III вер – Васильева Татьяна Ивановна, Провой кундемысе Чакмарий тӱвыра да каныме рӱдер.
«Марий йӱлам жаплыше» номинацийыште палемдалтыныт:
– Кузнецова Лидия Егоровна, Оршанке районысо Чирки ялысе тӱвыра пӧрт;
– Васюкова Текуса Вячеславовна, Курыкмарий районысо Йылъял тӱвыра пӧрт (вуйлатыше – Нестерова С.Г.);
– Юлсер кундемысе Памар кыдалаш школын 8 классыште тунемшыже-влак Александрова Ульяна, Тихонова Карина, Чернова Ольга, Шулепова Анастасия (вуйлатыше – Яковлева Наталья Ивановна);
– Терехова Надежда Ибаевна, У Торъял районысо Немда ялысе тӱвыра пӧрт (вуйлатыше – Терехова Роза Витальевна);
– Морко районысо Изи Кугунур ялысе тӱвыра пӧрт пеленысе «Ӱшӱт сем» фольклор ансамбль (вуйлатыше – Васильева И.Н., программын авторжо – Александрова Лидия Александровна).
Пайремна марий сийлан поян лийын. Марий тӱвыра рӱдер пеленысе «Чон оҥгыр» фольклор ансамбльын пашаче участницыже-влак подкогыльым тӱрленыт. Шолтенже тудым рӱдерын пашаеҥже Геннадий Григорьев да марий кочкышым пагалыше, пайремын унаже-влак тауштен-тауштен кочкыныт. Тыгак изи когыльым тыштак коҥгаш кӱэштын, калыклан темлыме.
Пайремын йылмыже – муро
Пайремын йылмыже – муро, маныт. «Угинде» пайрем муро сийже пеш поян лийын. Юлсер кундемысе «Шийгорно» (Карай ял), Провой кундемысе «Олык сем» калык (Исменца села), Оршанке район гыч «Кӱдыроҥгыр» (Лужбеляк ял), Медведево кундем гыч «Муро аршаш» (Шойбулак поселко) да «Мур пеледыш» (Знаменский поселко), У Торъял район гыч «Ший оҥгыр» (Тошто Торъял), Йошкар-Ола гыч «Чон оҥгыр» да «Падыраш» фольклор, «Юкече» ансамбль-влак, мурызо Снежана Орлова, Виталий Кучергин, Александр Марков «Муро сий» концертым сӧрастареныт.
Пайремыш толшо уна-влакым Марий тӱвыра рӱдерын вуйлатышыже, Кугыжаныш погынын депутатше Наталья Пушкина, Тӱвыра, савыктыш да калык-влакын пашашт шотышто министерствын пӧлка вуйлатышыже Михаил Чемышев саламленыт.
