Унагудым калык поэт Геннадий Сабанцев-Ояр вӱден. Тушко марий поэт, ятыр финн-угор поэтым  марий лудшылан палдарыше, Марий писатель ушемын йыжъеҥже, Марий Эл Республикын сымыктышын сулло пашаеҥже Альбертина Иванова, калык поэт Зоя Дудина, Марий писатель ушемын йыжъеҥже Анатолий Ишалин толыныт.

Нуно унагудын унаже-влакым – Марий кугыжаныш университетын студентше да преподавательже, марий серызе-влакым – финн-угор поэт-влакын марлаш кусарыме почеламутышт дене палдареныт, финн-угор писатель-влакын конгрессышт деч вара  родо-тукым калык гыч лекше серызе-влаклан келшымаш кӱварым чоҥымаште тыршымыштым палдареныт. Кодшо курым индешлумшо ий тӱҥалтыште эртыше тыгай мероприятий вашеш «Родо-тукым улына» книгам савыктыме. Тушко 11 финн-угор калыкын писатель да поэт-влакын возымыштым марла кусарен лукмо. Тыгак пеҥгыде кылым ыштымаште финн, эстон, венгр-влак дене мер ушем-влакын надырышт кугу лийын. Тидын нерген образований сферын паша ветеранже Римма Катаева каласкален. А финн-угор самырыкъеҥ-влак дене ыштен шогымо пашаже нерген Марий тӱвыра рӱдерын вуйлатышыжын алмаштышыже Василий Петров палдарен.

Гармоньчо Эльвира Петрова финн да мордва калык муро-влакым йоҥгалтараен. Коми йылме гыч марлаш кусарыме почеламут негызеш возымо шке мурыжым Геннадий Григорьев муралтен ончыктен.