31 октябрь – 2 ноябрьыште Йошкар-Олаште Марий калыкын XII погынжо лиеш.

Ныл ийлан ик гана эртаралтше, уло Россий гыч марий-влакым чумырышо ты кугу форум тений Ешын идалыкшылан пӧлеклалтеш. Тиде амал денак тушто палемдыме вич секцийжат лач ты теме денак кылдалтыныт: «Еш да йӱла», «Еш да тӱвыра», «Еш да шинчымаш», «Еш да тазалык», «Еш, науко да цифровизаций». Погыныш чылаже Российын 20 регионжо гыч 430 делегат толшаш.

Тений тудо икмыняр площадкыште лиеш: М.Шкетан лӱмеш Марий кугыжаныш драме театрыште, Эрик Сапаев лӱмеш опер да балет театрыште, Калык-влакын келшымаш пӧртыштышт, тӱссымыктыш галерейыште, мер-политик рӱдерыште.

Марий Погын жапыште Марий паркым да «Ачамландын талешкыже-влак» тоштер-патриот рӱдерым почыт.