15 октябрьыште Ялысе ӱдырамаш-влакын тӱнямбал кечыштым палемдат. 2008 ий гыч палемдаш тӱҥалме. ООН-ын Тӱҥ Ассамблейжын «Ялысе кундемлаште ӱдырамаш-влакын илыш йӧныштым саемдымаш» пунчалже почеш увертаралтын.
Тӱнямбалне илыше чыла калык гыч нылымше ужашыже ялысе ӱдырамаш улыт. Нуно сурт-печым кучен илат, калык йӱлам аралымаште, ял илышым сылнештарымаште кугу надырым пыштат.
Ялысе ӱдырамаш-влак тӱвыра аланыштат чолгалыкым ончыкта. Ялласе фольклор, мурышо да куштышо ансамбльлашке коштыт, самырык тукымым, шке йоча ден уныкашт-влакым кугезе коча-кована-влакын йӱлаштым, пайрем радамышт дене палдарат. Тау нунылан! Мер да еш сомылышт тек ушнен шогат.