Мероприятий 13 ноябрьыште Йошкар-Олаште, Калык-влакын тӱвыра пӧртыштышт, эрта. Тудо Ешын идалыкше кышкарыште лиеш да Марий Эл Республикын 104 ияш шочмо кечыжлан пӧлеклалтеш. Уш-акылым тергыше мероприятий 11 шагатлан тӱҥалеш.
Тушко республикысе кажне школ ушнен кертеш. Тидлан куд еҥан командым погыман, капитаным сайлыман.
Ӱдыр-рвезе-шамыч пӱсӧ уш-акылыштым кум турышто ончыктат. Кажныштыже – 12 йодыш. Икымше турышто шочмо кундемын лӱмлӧ еҥже-влак нерген, кокымшышто – марий йылме да литератур, кумшышто – марий йӱла дене кылдалтше йодыш-влак лийыт.
Чын вашештыме йодышлан ик балл шындалтеш. Сеҥыше команде кубок, диплом да пӧлек дене палемдалтеш. Кажне командылан сертификат, пӧлек кучыкталтеш.
Марий Эл Республикын тӱвыра, савыктыш да калык-влакын пашашт шотышто министерствын полшымыж дене Республикысе марий тӱвыра рӱдер эртара.