13 ноябрьыште Калык-влакын тӱвыра пӧртыштышт «Мунло» интеллектуал марафон лиеш. Республик кӱкшытан ты мероприятий тений Ешын идалыкше кышкарыште эрта да Марий Эл Республикын 104 ияш шочмо кечыжлан пӧлеклалтеш.

Марафоныш кундемнан кажне школжо ушнен кертеш. Лачак куд еҥан командым чумырыман, капитаным ойырыман. Модыш кум раунд гыч шогаш тӱҥалеш: «Шочмо кундемын лӱмлӧ еҥже-влак», «Марий йылме ден литератур», «Марий калыкын йӱлаже». Кумытыштыжат 12 йодыш лиеш.

Сеҥышыш эн шуко йодышлан вашмутым пуышо команде лектеш. Тудо кубок дене палемдалтеш да чемпион лӱмым налеш. Призовой верым налше-шамычлан диплом ден пӧлекым кучыктат.
Мероприятийыш ушнан кумылан-влак йодмашым 2 ноябрь марте mari-centr_konkurs@mail.ru электрон почтыш колтышаш улыт.