25 октябрьыште Ленинград областьысе «Невский пятачок» мемориал комплексыште Кугу Ачамланде сар годым марий кундем гыч Ленинград велне вуйым пыштыше салтак-влак лӱмеш мемориал кӱм пайремлын почмаш эртен.
Мероприятийыште Марий Эл вуйлатыше Юрий Зайцев ден Ленинград областьын губернаторжо Александр Дрозденко лийыныт.
Марий Эл гыч делегаций радамыште Марий Эл Республикын Виктерым вуйлатышын алмаштышыже — Тӱвыра, печать да калык-влакын пашашт шотышто министрже Константин Иванов лийын.

Ленинградым фашист кашак деч утарыме годымМарий АССР-ын «Вместе защищали Ленинград» шарнымаш книгаш пуртымо данный почеш, 4469 землякна бойышто, сусыргымо дене колен, увер деч посна йомын.
Марий Эл вуйлатыше Юрий Зайцев проектым илышыш пурташ темлыше-влаклан да губернатор Александр Дрозденколан тауштен.
— Йӱдвел рӱдолаште мемориалым вераҥдыме нерген йодыш дене мый декем Марий Элысе ветеран-влакын организацийышт лектын. Тиде мыланна — кугу событий, вет Ленинград блокадым пытарымылан 80 ий эртен, фашист Германийым тӱрыс шалатымылан — 79 ий, — палемден Юрий Зайцев. — Нацизм угыч мемнан элын лӱдыкшыдымылыкшылан эҥгекым ышта, историй фактым ондален савыркалаш тыршат гынат, тидым ышташ огына пу. Ме ачана, кочана ден кугеже кочана-влакым подвигыштым эреак шарнена.
Мероприятийыш толшо-влак ик минутлан шып шогалын, Ленинградым аралыше-влакым шарналтеныт, у мемориал ончылан пеледыш аршашым пыштеныт.