Марий тӱвыра рӱдерын 25 ияш лӱмгечыже лишемеш. Тудо пашам 1999 ий 10 ноябрь гыч ышташ тӱҥалын.
Икымше кече гычак марий тӱвырам республикыште илыше моло калыклан палдарымаште, олаш марий тӱсым пуртымашке, марий-влак илыман регион-влак дене тӱвыра пашам вияҥдымашке кумылын ушнен. Сандене тӧнежын лӱмгечыже чылан марийын пайремже манаш лиеш.
25 ияш лӱмгечым кугу концерт дене вашлияш тӱҥалына. Тудо 13 декабрьыште В.И. Ленин лӱмеш тӱвыра полатыште эртаралтеш, 18.30 шагатыште тӱҥалеш.
Палемдыман, 25 ий жапыште Марий тӱвыра рӱдер пелен ятыр усталык коллектив шочыныт да марий йӱла, кугыжаныш пайрем-влакым эртарымаште кугу полышым ыштеныт. Тушко йоча, тӱрлӧ сферыште тыршыше, сулен налме канышыш лекше-влак, чылаже 50 утла еҥ, коштыт. Нуно вич коллективын, вокал студий-влакын участникышт улыт, марий тӱвырам да йӱлам, йылмым ола кӧргыштӧ аралаш да вияҥдаш суапле пашам ыштат. Концертыште «Чон оҥгыр», «Сото вий», «У муро», «Юкече», «Марий хор» коллектив-влакын, «Падыраш» йоча фольклор ансамбльын мастарлыкыштым аклаш лиеш.
Марий тӱвыра рӱдерым муркостенечышт дене саламлаш толыт:
— Пошкырт кундем гыч мурызо да тӱвыра пашаеҥ Васли Ольош (А. Ибулаев) ден самырык тале гармоньчо Иван Петраев;
— «Чоным почын мурена» проектын мурызыжо-влак Эльвира Трифонова, Володя Матвеев, Йорга Каче, Ирина Якаева, Вера Горохова;
— марий мурызо-влак Вадим Краснов, Александр Марков, Станислав Устюгов, Алексей Юнусов, Александр Веткин;
— Марий Элын калык артисткыже Светлана Строганова, Марий Элын сулло артисткыже Марина Почтенева;
— Советский районысо Кельмаксола тӱвыра пӧрт пеленысе «Мари гармонь» калык семӱзгар ансамбль.
Пагалыме йолташ-влак! Концертыш пагален ӱжына. Концертыш билетым В.И. Ленин лӱмеш тӱвыра полатын кассыштыже налаш лиеш. Лекше йодышым 8(8362)45-88-51 телефон дене рашемдаш лиеш.