1 ноябрьыште Йошкар-Олаште Марий паркым почмо. Тушто Марий калыкын 12-шо Погынын делегатше- влакат лийыныт.
Палемдыман, тудым «Оласе йӧнан кумдыкым ыштымаш» федерал проект почеш чоҥымо. Паркым кок ий наре ыштеныт. Тӱзландарыме кумдыкым оласе калык рейтинг йӱклымаште ойырен налын. Пашан акше 74 миллион теҥгем эртен.
Почмашке Марий Элым вуйлатыше Юрий Зайцев, Кугыжаныш Погыным вуйлатыше Михаил Васютин, сенатор- влак Константин Косачёв ден Сергей Мартынов, Оньыжа Эдуард Александров, Йошкар-Олан мэржын пашажым жаплан шуктышо Антон Трудинов миеныт.
«Марий парк — оласе у кумдык, йӱла да у креатив паша вер. У парк чылалан калыкле илыш дене кылдалтше вер лиеш. Тушто каныме парк, куштымо вер, усталык кумдык- влак улыт. Тыштак марий калыкын йӧратыме пайремже- влак эртаралташ тӱҥалыт», — палемден Юрий Зайцев.

Паркым почмо тӱвыра программым Марий тӱвыра рӱдер эртарен. Тудым рӱдерын вуйлатышын пашажым жаплан шуктышо Ирина Якаева ден Марий Элын сулло артистше Павел Ефимов вӱденыт.

Погынышо еҥ-влакым «Марий Эл» кугыжаныш куштышо ансамбль, Марий Элын калык артистше Иван Смирнов, Марий Эл Республикысе тӱвыран сулло пашаеҥже Эльвира Трифонова, мурызо-влак Вадим Краснов, Станислав Устюгов да Сергей Пакеев куштымаш да мурышт дене куандареныт.



А погынышо калык «Марий памаш» калык да «Чон оҥгыр» фольклор ансамбль-влак дене пырля сцене ончылно «Йыр куштымашыште» тавалтеныт, «Кандырам» пуненыт.

Мутат уке, оласе у кумдыкым калыклан канаш, турист-влаклан марий йӱла пайрем дене палыме лияш чыла йӧным ыштыме. Тыште тыгак республикысе муниципалитет-влак нерген палдарыше стенд-влакым вераҥдыме, марий йомакла гыч геройыштым пу гыч пӱчкеден лукмо скульптур-влакым шогалтыме.

Вара Шкетан лӱмеш марий драме театрыште Погыным торжественно почмаш эртен, вич секцийлаште пашам тӱҥалме. Кастене уна- влак театрыште «Кеҥеж йӱд» спектакль лийын. Эрлашыжыи Погын шке пашажым умбакыже шуэн.