Мероприятий Марий Элын Тӱвыра, савыктыш да калык-влакын пашашт шотышто министерствыжын полшымыж дене эртен. Мо дене тудо ойыртемалтын? Организаторжо – республикысе Марий тӱвыра рӱдер – тушко Йошкар-Олаште илыше тӱрло калыкын национальный автономий ден диаспорылашт гыч команде-влакым ушен. Куд команде таҥасен: тушто марий, татар, руш, армян, дагестан, еврей, азербайджан-влак лийыныт. А ик команде Марий кугыжаныш университетын икымше курс гыч студентше-влак гыч шоген. Марий команде семын Марий калык конгрессын еҥже-влак шке уш- акылыштым ончыктеныт. Тудым Эдуард Иманаев вуйлата.
Модаш оҥай ыле. Мыят «Конргэссмэн» командыштыже лийынам. Организатор-влак моткоч оҥай йодыш-влакым ямдыленыт. Нуно Российыште илыше калык-влакын историйышт, тӱвырашт, йӱлашт, сылнымутышт дене кылдалтыныт. Шуко йодышыжлан вигак чын вашештыме гын, южышт нерген утларак шонкалаш кӱлын. Мутлан, Российыште илыше тӱрлӧ калык нерген возышо автор-влакын икмыняр произведенийыштым вигак шарналташ куштылгыжак огыл ыле. Але могай калык У ийым 1 апрельыште палемда? Могай пӧлекым татар-влак унала коштмышт годым эре гаяк пырля налыт? Могай саскам армян-влак «армян олма» маныт? Икманаш, модшо-влак шкештат шуко уым пален налыныт, шинчымашыштым пойдареныт.
Эшежым, мероприятий тугай поро, весела, шокшо кумыл дене эртен. Икте-весым ужын мутланашат, ӱчашашат куанле лийын. Тидлан организаторлан таум ыштыман. Марий тӱвыра рӱдер рӱдолаштына илыше калык-влак кокласе кылым пеҥгыдемден толмылан чынжымак кугу верым ойыра, эре у йӧным кычалеш. Нине калыкын представительже-шамычат чыла мероприятийыш кумылын ушнат. Мутлан, ик команде модыш тӱҥалмеке гына погынен шуктыш, варашрак толыныт ыле. Сандене тушко дагестан, еврей, азербайджан ӱдыр-рвезе-шамычат логалыныт. А шке командыштым «Луговые горцы» манын лӱмденыт, лектеш – курык гыч олыкыш волышо-влак. Нунак Гран-прим сеҥен налыныт. Кумшо турышто марий командым ик баллан эртен кертыныт. «Конгрэссмэн» командына да татар-влакын «Алгашт» баллым ик семын погенна да икымше верыш лектынна. Кокымшо верыш «Двуглавый орёл» команде лектын. А туштыжо тӱҥ шотышто ученый, командышт семынак йоҥгалтше мер органи зацийын еҥже-влак лийыныт. Кодшо ийын лач тудо Гран-прим сеҥен ыле. Кумшо армян-влак лийыныт. Университет студент-влакын командыштымат мокталтыман: кугурак ийготан-влак дене уш-акыл шотышто таҥасаш лӱдын огытыл, модмашке ушненыт. Нунылан посна дипломым кучыктеныт.
Вуйушым пудыратыме пайремым рӱдер пеленысе «Падыраш» йоча фольклор ансамбль, «У муро» вокал студийым вуйлатыше Геннадий Григорьев сӧрастареныт.
