Марафонец-влакым Тӱвыра, савыктыш да калык-влакын пашашт шотышто министрын алмаштышыже Игорь Садовин, Марий тӱвыра рӱдерын директоржо Наталья Пушкина саламленыт.
Ӱдыр-рвезе-шамыч пӱсӧ уш-акылыштым кум турышто ончыктеныт. Кажныштыже 15 йодыш лийын. Икымше тур шочмо кундемын лӱмлӧ еҥже-влаклан пӧлеклалтын. Кокымшышто марий йылме да литератур дене кылдалтше йодыш-влаклан вашештеныт, кумшышто марий йӱлам палымыштым ончыктеныт.
Эн сай шинчымашым Куженер район Коҥганур школын тунемшыже-шамыч ончыктеныт, сеҥышыш лектын. Тунемше-влакым уш-акыл модмашыш марий йылмым туныктышо Галина Тобекова ямдылен. Нунылан дипломым да кубокым кучыктеныт.
Кокымшо верым Советский район Ӱшнӱр школын, кумшым Национальный гимназийже ӱдыр-рвезыже-влак налыныт. Нине тунемме заведениийлаште йоча-влакым марий йылме деке Зинаидв Волкова ден Эльвира Петрова кумылаҥден шогат.
Кажне командылан сертификатым, пӧлекым кучыктымо.
