Салтакыш ужатыме йӱла кажне калыкын уло. Марий калыкынат салтакыш ужатыме шке йӱлаже уло.
Поян ӱстелым еш поген, пошкудо-родо-тукымым ӱжеш. Юмылан пелешташ толшо карт кугыза киндынерым рвезылан кучыкта. Кажныже сугыньмутым ойлен, куштылго салтак илышым, пӧртыл толаш кӱчык корным тыланен, ший оксам пуа.
Армийыш ужатыше рвезе тувыржо дене ӱстел ден пӱкен йолым кылда. Вара, пӱкеныш шогалеш, авагаштам ӧндалмыла ышта, тусо лончыш ший оксам чыка. Аваже корныш тичмаш киндым пуа, ший оксам кидышкыже пышта. Чыла йӱлажат рвезылан порын служитлен, мӧҥгӧ савырнен толаш пиал корным ышта.