Кызыт Йӱштӧ кугыза могай тӱсан вургемым чия? Канде але йошкар тӱсаным. Пеш ожно Руш кугыжанышыште Теле да Йӱштӧ юмылан кумалыныт.
Теле юмын кум шольыжо лийын, икымшыже ош ужга чиен, чыла кылмыктен. Кокымшо шольыжо кандалге ужга дене коштын, йолагай, эркын коштшо-влакым поктылын. Кумшыжо йошкар ужган лийын, пашаче еҥым пагален, шӱргыштым йошкартарен моторештен. Кызытсе руш сылнымутышто нуным Студенец, Дед Трескун але Корочун семын палена. Варажым, руш калыкын христиан вераш куснымеке, нине юмо-влак нерген ойлаш чарыме.
Петр Первый кугыжа Европо гыч Николай Чудотворец гай койшо Санта-Клаусым конден, У ийым 31 декабрь — 1 январьыш кусарен. Йӱштӧ кугыза йошкар ужга ден йошкар упшым чияш тӱҥалын.
Октябрь революций деч вара черке деч кораҥме. У ийым вашлияш вес образ кӱлын, сандене 1935 ийыште И. Сталинын порученийже почеш «Правда» газетыште йоча-влаклан У ийым христиан верам налме деч ончычсо Йӱштӧ кугызан образшылан эҥертен вашлияш темлымаш савыкталтын.
20 курымыштак Йӱштӧ кугыза йошкар тӱсан мыжерым чияш тӱҥалын. Руш калыкын йӱлаште йошкар тӱс вийым, илышым, шокшым да пайремым ончыкта. Ожныракше пайремлан пӧртым сӧрастарыме годым йошкаргым кучылтыныт, поянлыкым да тазалыкым ончыктен. Сандене тиде тӱсым теле юзылан ойырымо, теле йуштыштӧ ырыкта, илыш вийым пуа, куаным конда.
Марий Йӱштӧ кугызан шочмо кечыже – 22 декабрь. Лач тиде кечын 2012 ийыште тудлан паспортым кучыктымо. А мыжерже тудын ошо але кандалге, йошкар потан, марий тӱран.