20 ноябрьыште Йошкар-Оласе аграрный колледжын залыштыже Марий тӱвыра рӱдер марий драматург Н.Арбанын шочмыжлан 100 ий темме лӱмеш студент-влак дене вашлиймашым эртарен. Н.Арбан Марий АССР искусствын сулло пашашеҥже, Марий Элын калык писательже, марий калыкын пеш тале, уста эргыже. Калык тудым поэт, драматург, художник, балетмейстер семын пала. Николай Михайлович ӱмыржӧ мучко ӱшанле пелаш, сай ача семын ойыртемалтын. Ватыже, Виктория Евгеньевна дене коктын ныл эргым да ик ӱдырым ончен куштеныт.

«Марий кундемым йӧратен…» пайрем вашлиймашышке саламлыме мут дене Марий Эл Республикын тӱвыра, печать да калык-влакын пашашт шотышто министрын алмаштышыже Галина Степановна Ширяева, Йошкар-Оласе аграрный колледжын директоржо Богданов Геннадий Владимирович, Марий тӱвыра рӱдерын вуйлатышыже Валерий Помбеевич Григорьев, радиожурналист, Марий Элын сулло арстисткыже Раисия Данилова толыныт да поро шомак дене Николай Арбаным шарналтеныт. Тыгак вашлиймаште Н. Арбанын эргыже Олег Николаевич да уныкаже Игорь Олегович лийыныт. Нуно студент-влаклан Н. Арбан нерген оҥай историй-влакым каласкаленыт. Пытартышлан коктынат гитара дене «Кеҥеж йӱд» мурым шокталтен мурпӧлекым ыштеныт.