Акцийын цельже: марий калыкын тÿвыра поянлыкшым вияҥдыме да саклыме шот дене Марий Эл Республикыште, марий-влакын тӱшкан илыме моло кундемлаште, тыгак йотэллаште марий да моло калыкым шочмо йылме деке кумылаҥдымаш.
Школышто тунемше ден туныктышо, методист ден воспитатель, кӱшыл школысо тунемше ден туныктышо, шанче, тӱвыра пашаеҥ, журналист, кугыжаныш да муниципал служащий, тыгак чыла кумылан-влакым диктант возаш ӱжына.
Марий кугыжаныш университетысе калыкле тӱвыра да тӱвыра кокласе коммуникаций институтышто тыгай адрес дене диктантым серена: Йошкар-Ола, Кремль урем, 44 (Марий кугыжаныш университетысе УЛК, Йошкар Армий урем могырым пурыман).
Диктантым тыгак Марий Эл Республикын С.Г. Чавайн лÿмеш калыкле книгагудышто возаш лиеш. Адресше: Йошкар-Ола, Пушкин урем, 28.
Акций 10.00 шагатлан тӱҥалеш.
Возышо-влакым 09.00 шагат гыч 10.00 шагат марте регистрацийыш вучена.
Чыла мероприятий моско жап дене эртаралтеш.
Россий Федерацийын регионлаштыже, тыгак вес эллаште диктантым синхронно возаш лиеш. Тидлан муниципал / тӱвыра / туныктышо тӧнежлаште диктантлан вуйын шогышо-влак деч Марий кугыжаныш университетысе калыкле тӱвыра да тӱвыра кокласе коммуникаций институтын марий йылме да сылнымут кафедрыжын электрон почто адресышкыже (mardiktant@mail.ru) 2022-ше ийын, телын 6-шо кечыже марте, диктантым возаш йодмашым колтыман.
Акцийыш ушнышо-влаклан диктант сераш бланк колталтеш. Возышо-влакын йодмашышт дене келшышын ончыктымо электрон почто адресыш 2022-шо ийын, телын 8-ше кечыштыже, 09 шагатат 45 минутлан, диктант текст колталтеш.
ВКонтакте да моло социальный сетьлаште, Марий Эл Радио эфирыште, МЭТР да «Акпарс» студийыште вияш трансляций лиеш. Трансляций пытымеке, онлайн-диктантым возышо-влак шке возымыштым терген кертыт. Ссылкым тыгай хэштег-влак дене муаш лиеш: #МарийДиктант, #МарлаДиктант, #МарлаЧынВозена, #МарлаТӧрСиренӓ.
Муниципал / тӱвыра / туныктышо тӧнежлаште диктантлан вуйын шогышо-влак возымо пашам тергаш тӱҥалыт да сеҥыше-влакым саламлат.
Чыла возышо-влаклан Марий кугыжаныш университетын сертификатшым пуат. Сертификатым налашлан оргкомитетын электрон почто адресышкыже (mardiktant@mail.ru) муниципал / тӱвыра / туныктышо тӧнежлаште диктантлан вуйын шогышо-влакым офлайн йӧн дене серыше-влакын спискыштым, тыгак онлайн йӧн дене диктантым возышо-влакын текстыштын скан але фотоштым колташ йодына.
Муниципал / тӱвыра / туныктышо тӧнежлаште диктантлан вуйын шогышо-влак республике кӱкшытыштӧ эртарыме акцийын лектышыжым иктешлаш Марий кугыжаныш университетысе калыкле тӱвыра да тӱвыра кокласе коммуникаций институтын марий йылме да сылнымут кафедрын электрон почто адресышкыже (mardiktant@mail.ru) 2022-ше ийын, телын 8-ше кечыштыже, 15.00 шагат марте, диктантым возышо-влакын чотыштым да сеҥыше-влакын спискыштым, тергыме диктантыштын сканыштым колтышаш улыт.
Мемнан дене тыге кылдалташ лиеш: 8(8362) 68-79-10.
