29 ноябрьыште Марий тӱвыра рӱдер марий КВН-ым эртара. Ончылгоч палемденна ыле, тушко кум команде ушнен. Тиде – Йошкар-Ола гыч«10 КА» (капитан Игорь Попов), «Кечан кече» (капитан Валентина Семенова) да Пошкырт кундемысе Мишкан села гыч «МММ» (капитан Алексей Ибулаев). Кодшо кечылаште нылымше команде марий мыскара фестивальыш ушнаш кумылжым ончыктыш. «Манеш-манешым» Ирина Петрова поген.
Палемдыман, марий КВН Ешын идалыкшылан пӧлеклалтын. Участник-влак кок конкурслан ончылгоч ямдылалтшаш улыт: иктыже – 5-7 минуташ визит картычке, весыже – «Муно чывым туныкта» мӧҥгысӧ паша, тыгак Ешын идалыкше дене кылдалтше кум йодыш гыч таҥасыше командылан ямдылышаш улыт.
Марий мыскара фестиваль Калык тӱвыра пӧртыштӧ шушаш кугарнян лиеш, 18 шагатлан тӱҥалеш.