Йочам аваже туныкта гын, пашалан чулым лиеш, ачаже туныкта гын – ушлан лывырге лиеш. Марий калыкмутын чынже 30 ноябрьыште «Ача-ава дене пырля» еш конкурсышто раш койо.
Мероприятийым Звенигово оласе «Мечта» тӱвыра пӧртын «Самырык тукым» триожо почо, пайрем кумылым пуртыш.
2024 ий – Ешын идалыкше. Марий тӱвыра рӱдер тудым «Ача-ава дене пырля» таҥӱчаш дене иктешлыш.
Усталык таҥӱчаш вич район да Йошкар-Олаште илыше 10 марий еш-влакым чумырыш.
Моткоч оҥайын кажне еш шкешт да йочашт нерген каласкалышт. Теве У Торъял район гыч Екатерина ден Евгений Садовинмыт ойлымо дене ышт серлаге, импровизированный манме пӧртымат нӧлтен шындышт. Тыгак шке тукымвожым шымлыме нергенат оҥай каласкалымаш ыле.
Кокымшо конкурсышто йоча-влак ача-авам йӧратыме кумылыштым почыч, муралтышт, кушталтышт, семӱзгар дене шокталтышт. Рэпымат мурен моштат, марлат сайын мутланат, марла лывыргын куштат.
Кумшо конкурсыш ача-ава-шамыч ушненыт, нунылан тӱрлӧ заданийым пуымо. Тиде таҥӱчаш гыч рашемын, кузе кажне еш пырля жапым эртара, тыгак шарналтышт йоча малтыме мурымат, йомакымат каласкален пуышт, модыш денат модыктышт. Нунын выступленийышт гыч ешым аралыше поро шӱлыш, икте-весым пагалыме кумыл шижалте.
Еш конкурсым жюри аклен. Тиде сомылым Марий Элын калык писательже Зоя Дудинлан, мурызо. Олык Ипай лӱмеш премийын лауреатше Эльвира Токташева ден Марий тӱвыра рӱдерым вуйлатыше Ирина Якаева шуктеныт.
Кажне ешым посна номинацийыште палемдыме:
— «Эн сай еш» – Куженер поселко Татьяна ден Владислав Петуховмыт (п. Куженер);
— «Пеҥгыде еш» – У Торъял район гыч Екатерина ден Евгений Садовинмыт;
— «Келшен илыше еш» – Йошкар-ола гыч Лилия Некрасован ешыже;
— «Эн чолга еш» – Алена ден Александр Толстовмыт (Звенигово район);
— «Вуйын шогышо еш» – Йошкар-Ола гыч Захаровмыт еш;
— «Шкешотан еш» – Морко поселко гыч Ирина ден Евгений Цветниковмыт;
— «Йӱлам аралыше еш» – Морко район Коркатово гыч Иванов-Изотовмыт;
— «Сымыктышым йӧратыше еш» – Морко район Изи Кугунур гыч Петровмыт;
— «Поро кумылан еш» – Йошкар-Ола гыч Яковлевмыт еш;
— «Устан модшо еш» – Медведево поселко гыч Екатерина Ятманован ешыже.
Конкурсыш толшо-влакым Тӱвыра, печать да калык-влакын пашашт шотышто министрын алмаштышыже Игорь Геннадьевич Садовин саламлыш да палемдыш: «Еш пеҥгыде лиеш гын, шочмо элнат виян лиеш». Да конкурсым ончен шинчыме жапыште шкенжын возымо ныл корнан почеламутым лудо:
— Ача-ава дене пырля
Кажне кечын пеш ласка.
Сеҥен кертына чыла –
Курымешлан еш шепка.
Моткоч чын каласыме. Кажне ешыште, кажне суртышто тек йочан куанен юарлымыже шокта, икте-весым пагалыме кумыл озалана. Поро ешыште тоят пеледеш, маныт.