5 декабрьыште марий йылмым пагалыше кажне еҥ «МАРЛА ЧЫН ВОЗЕНА» XII тӱшкале диктант» тӱнямбал кӱкшытан акцийыш ушнен.
Йошкар-Олаште тудо кок верыште: Марий кугыжаныш университетын калыкле тӱвыра да тӱвыра кокласе коммуникаций институтыштыжо да С. Чавайн лӱмеш калыкле книгагудышто – эртен.
МарКУ-што акций саламлымаш гыч тӱҥалын. Акцийын участникше-влакым ректор Михаил Швецов, Кугыжаныш погын вуйлатышын алмаштышыже, Российысе калык-влакын ассамблейыштын Марий Элысе пӧлкажым, калыкле-тӱвыра федерал автономийым вуйлатыше Лариса Яковлева, Тӱвыра, печать да калык-влакын пашашт шотышто министрын алмаштышыже Игорь Садовин саламленыт.

Диктантын текстше – марий прозаик Юрий Артамоновын «Вучымо вашлиймаш» возымыж гыч ужаш.
Акцийыш студент, туныктышо-влак ушненыт. Марий тӱвыра рӱдерын пашаеҥже-влакат нунын дене пырля лийыныт, диктантым возеныт.

Поснак палемдаш кӱлеш Калыкле сымыктыш гимназийын тунемшыже-влакым. Туныктышышт Эльвира Петрова нунылан сай пример улеш: шкежат диктантыш ушнен, тунемшыже-влакымат марий йылмым пагалаш туныкта.

Кажне возышылан сертификатым кучыктымо.
Сеҥыше-влакын лӱмыштым Марий тиште кечым пайремлыме годым каласат. Пайрем мероприятий 10 декабрьыште М. Шкетан лӱмеш Марий кугыжаныш театрыште эрта, 16.30 шагатлан тӱҥалеш.