10 декабрьыште Марий Эл Республикын «Марий тиште кече» кугыжаныш пайремжым кумдан палемдыме.
Мероприятий-влак радамыште «Мунло» интеллектуал марафон шоген. Тушко ий еда у команде-влак ешаралтыт, сандене тений кажне район гыч ик командым веле налаш палемдыме ыле.
Чумыржо кандаш район да Йошкар-Ола гыч 12 команде ушнен: Морко район гыч «Чолпан» (капитан Аркадьева Нина Вениаминовна), Йошкар-Ола гыч марий ӱдырамаш ушемын «Саскавий» (капитан Байкова Галина Ильинична), «Серызе – Писатель ушем» (капитан Петров Александр Алексеевич), «Югорно» (капитан Григорьев Геннадий Владимирович), «Ленин проспект» (капитан Михеева Валентина Сергеевна), Параньга район гыч «Матародо кундем» (капитан Морозова Алена Вячеславовна), Советский район гыч «Кундыш шÿдыр» (капитан Яншитова Роза Юрьевна), У Торъял район гыч «Торъял» (капитан Смирнова Лиана Владимировна), Куженер район гыч «Чумбылат» (капитан Богданова Светлана Платоновна), Волжский район гыч «Юлсер» (капитан Никифорова Надежда Геннадьевна), Звенигово район гыч «Волгыдо сескем» (капитан Максимова Любовь Викторовна), Медведево район гыч «Маскасола кундем» (капитан Кошкина Надежда Валерьевна).
Программым Марий тӱвыра рӱдерым вуйлатыше Ирина Якаева вӱден. Модмаш кум тур дене эртен, кажныште лу йодыш дене лийын. Йодыш-влак марий йылме да сылнымут, йӱла да Шочмо элнам чапландарыште марий калыкын лӱмлӧ еҥышт нерген лийыныт.
Эн шуко баллым Советский район гыч «Кундыш шӱдыр» команде поген, икымше верыш лектын. Кокымшо вер дене Параньга район гыч «Матародо кундем» палемдалтын. Кумшо верым Куженер район гыч «Чумбылат» команде налын.