15 декабрьыште 12 шагатлан Патриарший площадьыште Йӱштӧ Кугыза-влакын тӱшкан ошкылмашышт лиеш. Мероприятий «Марий теле» фестиваль кышкарыште эртаралтеш.
Программыште – марий Йӱштӧ Кугызан саламмутшо, управляющий компаний ден ТОС-влаклан У ий кожым пӧлеклымаш, Йӱштӧ Кугыза-влакын тӱшкан ошкылмашышт.
13 шагатлан марий Йӱштӧ Кугыза нуным Чарла кремльыште вашлиеш. «У ий шӱлыш» программым Марий тӱвыра рӱдер ямдылен. Тудын дене келшышын, «Падыраш» да «Чон оҥгыр» усталык коллектив-влак мурпӧлекым ыштат, марий Йӱштӧ кугыза ден Лумӱдыр юзо тоям кучыктат. Муро, модыш, йыр куштымаш пайрем программым сӧрастарат.
Чарла кремль гыч Йӱштӧ Кугыза-влак Рӱдӧ паркыш тӱшкан ошкылыт. Тыште нуно фотосессийым ыштен кертыт, йоча да кугыеҥ-влакым тӱрлӧ модыш, тыгак йыр куштымаш лийыт. А вара У ий пайремын тӱҥ юзо персонаж-влакым Ленин лӱмеш площадьыште, Марий Элын У ий тӱҥ кожшо воктене У ий олам почмаште вучат.