15 декабрьыште Йошкар-Олаште икымше гана Йӱштӧ Кугыза-влакын тӱшкан ошкылмашышт эртен. Тушко Йошкар-Оласе туныктымо, тӱвыра тӧнеж, предприятий-влак гыч 120 Йӱштӧ Кугыза ушнен.
Патриарший площадьыште ола пӧрт кудвечылаш шындаш елкым ТОС-ын, упарвляющий кампаний-влакын еҥыштлан пуымо. Елкым Киров олаште эртыше Йӱштӧ Кугыза-влакын флешмобышто марий Йӱштӧ Кугыза конден. Виче кундем гыч кондымо юзо тояжым Йӱштӧ Кугыза-влакын парадышт годым Марий Элысе Йӱштӧ Кугызалан «У ий шӱлыш» пайрем программе кышкарыште кучыктен. Мероприятий Чарла кремльыште эртен. Тушто тӱшкан ошкылмашын участникше-влаклан оҥай пайрем программым ямдылыме. Марий тӱвыра рӱдер пеленсе «Падыраш» йоча ансамбль, мурызо Эльвира Токташева Юлия ӱдыржӧ дене, рӱдерым вуйлатыше Ирина Якаева мурым йоҥгалтареныт, марий модмашыш изижат-кугужат ушненыт, сеҥышыш лекшылан але проворракшылан шере йокмам марий Йӱштӧ кугыза ден Лумӱдыр кучыктеныт.
Чарла кремль гыч тӱшкан ошкылмашыш ушнышо-влак рӱдӧ паркыште йоча-влакым саламмутышт, пырля куштымашышт, мурымашышт дене куандареныт.
Нуным Ленин лӱмеш площадьыште, Тӱҥ елко воктене, шӱдо дене калык вучен. Шушаш У ий пайрем дене Йошкар-Олан мэржын пашажым жаплан шуктышо Антон Трудинов саламлен. В. Ленин лӱмеш тӱвыра полатын йоча усталык коллективше-влак поян концерт программым ямдыленыт. Мутат, уке, У ий елкым пайремлын чӱктымаш, Йӱштӧ Кугызан пӧртшым (резиденцийжым) почмаш кажнылан эн куанле лийын.
Ончыкшым Тӱҥ елко йыр «Марий теле» кышкарыште тӱрло сынан пайрем программе-влак ямдылалтыт. Марий тӱвыра рӱдерат тений да шушаш ий янарьын икымше декадыштыже вич мероприятийым эртара.