Марий тӱвыра рӱдерын пашаеҥже-влак «Чон оҥгыр» фольклор ансамбльын участникше-шамыч дене пырля Йошкар-Оласе 17-ше номеран школышто «Марий калыкын наследийже» этноурокым эртареныт.
Марий-влак мыняр тӱшкалан шелалтыт? Илаш могай верым да молан ойыреныт? Могай семӱзгарыштым курым гыч курымыш саклен шогеныт? Тӱрлӧ верыште илыше марийын пӧръеҥ ден ӱдырамаш тувырышт ойыртемалтеш мо? Калык модыш туныктымашын йӧнжӧ семын палемдаш лиеш мо? Тиде да моло тӱрлӧ оҥай йодышлан вашмутым калык йӱла урокышто муаш лиеш.
Марий тӱвыра рӱдер школлаште этноурокым эртараш ямде. Тидлан ончылгоч +7 (8362) 45-88-51 телефон дене возалташ лиеш.
Калыкнан поян тӱвыражым, йӱлажым марий кундемыште илыше кажне йоча палышаш. Йӱланам, йылмынам, тӱвыранам аралена – ончыклыкым вияҥдена!