Марий Эл Республик Виктер вуйлатышын икымше алмаштышыже Михаил Васютин МарКУ-што тӱнямбал акцийыш ушнышо-влакым саламлен.

Михаил Зиновьевич шкежат акцийыш ушнен, диктантым серен.

Марий тӱвыра рӱдерым вуйлатыше, Кугыжаныш Погын депутат Наталья Пушкина кажне ийын «МАРЛА ЧЫН ВОЗЕНА» тӱшкале диктантыш ушна, сеҥыше радамыштат лийын. Теният Наталья Васильевна акцийыш ушнен. Тыгак рӱдер вуйлатышын алмаштышыже Василий Петров, методист Геннадий Сабанцев да «У муро» студийым вуйлатыше Геннадий Григорьев ушненыт.

Г. Григорьев: Акцийыш нылымше гана ушненам. Умылаш лийшын лудыныт, сандене нелылыкым шым шиж. Диктантын темыже келшыше ыле, возымеем годым марий патыр Онар нерген легендым угыч шарналтышым. Легендым шке жапыштыже марий шымлызе да писатель Ким Васин возен.