Вурс рельс, йомакысе шÿртым шарныктен, чодыра кöргыш кадыргыл пура. Корно воктенак келге корем. Пÿртÿсын курымаш вийже, сер рокым урыктарен, курык тайылым патыр копаж дене лоден шынден. Корем пундаш поезд деч ала-мыняр метрлан ÿлнö. Тушто кушкын шогалше кадыр куэ изин гына коеш. А корем гоч, ваштарешак, тура курык саҥга. Курык саҥгам ончалатат, ала-кö чылт йомакысе гай вийже дене тудым орален шынден манын, шоналтет.

Келге коремым, тура курык саҥгам ужын, ушыш тошто марийын ойлымыжо толын пура. Марий яллаште кызытат шоҥго-влак шуко оҥайым каласкалат, пуйто чыла коремым да курык тöвам пÿртÿс огыл, а ала-могай тале патыр ыштен.

Шоҥгыеҥ-влак тыге ойлат: пеш шукерте ожно – тиде жапым калык йомакысе семын веле шарна – Юл вÿд воктене пеш кугу патыр илен. Тудын лÿмжö Онар улмашын.

Онарын капше моткочак кугу. Шогалеш патыр айдеме – вуйжо дене олача-вулача шонанпыл марте изиш гына огеш шу. Садланак дыр шонанпылым южо могыр марий-влак але мартеат Онарпыл манын лÿмдат.

Шонанпыл тÿрлö чия дене йолга. Ончалат – шинчам йымыкта. А Онарын чийыме вургемже тиддечат мотор: ош тувыржым йошкар, ужар да нарынче порсын дене тÿрлымö. Кыдалыштыже – шырчан ÿштö. Вуйыштыжо – ший окан упш.

Онар капше да вургемже дене гына мо, вийже денат тÿням öрыктара! Тудо иканаште тошкалмаштыжак шым меҥгым ошкылеш. Ик ошкылым ышта – шым меҥге шеҥгелан кодеш. Тудо шкаланже корным кычал ок шого, вигак чодыра ÿмбач кая. Тÿжем ияш кугу тумым, якте пÿнчым тошкал вонча. Кугу чодыра тудлан тыгыде вондер дене иктак. Тудым лÿкö купат огеш чактаре. Купым Онар терке даҥыт лавыралан шотла.

Онар сонар дене илен. Янлыкым поктен, кöргашан пушеҥгылаште мÿкшым кычалын. Тудо шке кудыж деч пеш торашке коштын. Эрдене Юл тÿр илемже гыч лектешат, кечывал тураште Пижма ден Немда декат миен шуэш. Кечывал кочкышым Виче вÿд серыште шолта. Малаш адак уэш Юл тÿр тумерыш пöртылеш.

Икана Юл сер дене ошкылмыж годым йыдалышкыже ошман рок верештын. Онар олык покшелан шинчынат, йыдалжым руден да рокым почкалтен. Тидын деч вара Юл тÿрыштö тура курык лийын кодын.

Онарын корнымбалныже изи эҥер логалын. Кормыж рок йогынвÿдым тыманмеш пÿялен шынден. Йогынвÿд, умбакыже каен кертде, кугу ерыш савырнен шинчын.

Кызытат калык, чодыра кöргысö курык чоҥга ден ерлам ончыктен, тыге манеш:

 – Тиде Онарын кышаже. Тудын пашаже…     

                                                                     (Ким Васин семын)

                                                                                  (349 мут)