7 январьыште Йошкр-Оласе Марий паркыште «Шорыкйол» калык йӱла пайрем эрташ тӱҥалеш.
Тудым республикысе Марий тӱвыра рӱдер Марий Элын Тӱвыра, савыктыш да калык-влакын пашашт шотышто министерствыжын полшымыж дене эртара. Мероприятий 11 шагатлан тӱҥалеш.
Йӱла пайремым эртарыме программе поян. Мероприятийым мӧчӧр вургемым чиен толшо тӱшка-влакын парадышт почеш. Республикысе фольклор коллектив-влак шке усталыкыштым ончыктат. Пайремыш толшо кажне еҥ Шорыкйол годым эртарыме акрет марий йӱлам шуктен кертеш: лум каваным ыштымашке, тӱрлӧ мужедмашке ушнен сеҥа, вий-куатым йодшо модмаште шкенжым терга. А йоча-влакым модыш алан вуча.
Марий тӱвыра рӱдер пайремыш ушнаш кумылан-влакым вуча. Йодмашым mari-centr_konkurs@mail.ru электрон почтыш колтыман але лекше йодышым 8(8362) 45-88-51, сот. 8-961-334-01-54 телефон дене рашемдыман.