Чельньӹк пичӹ ӱл монгырышты лидӹ вуй гӹц, ыжар шуды логӹц, изи ӓнгӹртьортке юкланен йога. Тӹлзӹ сотеш шӧртньӹ ганьы вӹдшӹ йӹлгӹжеш. Шӹргӹ лошты шӹжвӹквлӓ изи вӹцкӹж юк доно цилӓ статян йӓнг ӹвӹртен мыралтат, Микитӓ тьотя доно попымыла чучыт. Тьотя колыштеш, сӓрнӓ. Йыдпелӓт шоэш веле, нимат уке, нима юкат ак шакты. Пӹлгомышты шӹдӹрвлӓ веле Микитӓ тьотям анжымыла чучыт. Изи мардежеш шапки ӹлӹштӓшвлӓ лывыге тӓрвӓнӹлӹт.
Кечӹ мычкы со мӱкшвлӓжӹ Микитӓ тьотян пӹлӹштӹнгӹштӹжӹ мӱнген каштыт. Кӹзӹт йыдат, ик мӱкшӓт тьотян пӹлӹштӹнгӹштӹ мӱнген каштшы уке, цилӓн ӹшке пӧртӹшкӹштӹ, уляшкышты, пырен шӹнзӹнӹт. Микитӓ тьотя чельньӹк пичӹ тӹрӹштӹ шалгалта. Колышт шалгышат, пӧртӹшкӹлӓ кӓнӓлтӓш ашкедӓш тӓрвӓнӹш.
Чельньӹк пичӹ шайылны – цыт-цот! – юк шактен колтыш. Микитӓ тьотя пыт колышташ тӹнгӓльӹ. Эче когон цудырге шакта. Анжа, тыгыды пӹркемвлӓ улат, мӹндӹркӹ ужын ак керд. Тупке ял юк лишемӓш тӹнгӓльӹ. Эче когон цудырге шакта. Микитӓ тьотян йӓнгжӓт йӓнг вӓрӹштӹ агыл, ӹшкежӓт ороды гань лин колтен, тамам ӹштӹмӹлӓ – ӹшкеӓт ак пӓлӹ. Шим ара мӱкш уля докы толят, улям тарваш тӹнгӓльӹ. Уля левӓшӹм шуды лошкы шуэн колтыш. Мӱкшвлӓштӹ лӓктӹнӹтӓт, ойхырымыла мӱнген каштыт, нимат ӹштен ак кердеп.
Микитӓ тьотя тусаренок анжалят, ижӹ пӓлӹш – уляжым мӧскӓ пыдырта. Чельньӹк пичӹ йӹр мычкы пӧртӹшкӹлӓ кыргыжаш тӹнгӓльӹ. Мӹндӹрнӹ агыл вес чельньӹкӹштӹ Йогор кугуза мӱкшӹм оролен ӹла. Микитӓ тьотя Йогор докы кыргыжы. Йогор докы миэнӓт, попенӓт ак керд, пиш когон йӓнгжӹ тӓрвӓнен шӹнзӹн. Йогор кугузан пичӓлжӹ улы. Пичӓлӹм нӓлевӓт, коктын чельньӹкӹш кыргыжевӹ. Кыргыж миӓт – нимат уке. Пыдыргышы уля веле шуды лошты киӓ. Мӱкшвлӓштӹ Микитӓ тьотя йӹр игӹжӹ гань сӓрнӓт, пынзыт. Йогор кугуза ӹшке чельньӹкӹшкӹжӹ мӱкшвлӓжӹм анжаш ашкедӹ.
Микитӓн шӱмжӹ тыл гань йыла. Мӱкшвлӓжӹм тӹкӓлӹнӹтӓт, пиш когон ойхыра. Шӹжвӹквлӓ сусун ӹвӹртен мырат гӹнят, Микитӓ тьотян ойхыжым шӧрен ак кердеп.
Микитӓ изижӹ годшенок чельньӹкӹм оролен ӹлен. Перви паян Кӹри чельньӹкӹм Микитӓлӓн оролыктен. Кӹзӹт Кӹрин чельньӹкшӹм колхоз нӓлӹн гӹнят, Микитӓмок оролаш коденӹт. Микитӓ тыменьӹн, мӱкшӹм анжен мышта, пӓшӓжӓт тьотялык – куштылгы пӓшӓ, маныт.
Н. Ильяковын «Чельньӹк оролы» шайыштмашыжы гӹц лаштык (300 шамак)
