27 январь элнан историйыштыже посна пале дене возалтын. Лачак тиде кечын 1944 ийыште Ленинград олам блокаде деч утарыме. Блокаде 900 наре кече шуйнен.
Кугу Ачамланде сар годым блокадым шалатымаште 490000 наре еҥ колен, а марий кундем Ленинградым аралымаште 4000 утла эргыж ден ӱдыржым йомдарен. Тидын нерген «Ший корно» регионысо марий калыкле-тӱвыра автономийын лукмо «Мы вместе защищали Ленинград» шарнымаш книгаште ойлалтеш.
2020 ий сентябрьыште Санкт-Петербург олаште Кугу Ачамланде сар годым Ленинградым аралымаште лийше марий кундемын шочшыжо-влаклан мемориал плитам почмо. Тудо Пискаревский мемориальный шӱгарлан шарныктыш аллейыштыже верланен. Тушко Ленинград ола верч кредалмаште вуйыштым пыштыше 134 салтакын лӱмжым пуртымо.
2024 ий октябрьыште «Невский пятачокышто» марий кундемын шочшыжо-влак лӱмеш стелым почмо. Тиде верым аралымаште 170 землякна вуйжым пыштен. Мероприятийыште Марий Эл Республикым вуйлатыше Юрий Зайцев ден Ленобластьын губернаторжо Александр Дрозденко лийыныт.
Ме Ленинградым аралыше салтакна-влак нерген огына мондо, кажныштым лӱм дене шарнена, пагалена. Тиде кечын школ ден тӱвыра тӧнежлаште тӱрлӧ мероприятий-влак эртат.