Йошкар-Олаште, Сеҥымашын ХХХ-шо идалыкше лӱмеш тӱвыра полатыште, «Сеҥымаш тулсавыш» калык усталык республикысе фестиваль почылтын.
Мероприятий кок ужаш гыч шога: калык прикладной сымыктыш да кидпаша мастар-влакын ончерышт, да усталык коллектив-влакын концерт программышт.
Ончерыште Йошкар-Оласе тӧнеж да посна кидмастар-влакын пашаштым лукмо. Марий калыкын ожнысо арверже да кызытсе кидпашаже дене Марий тӱвыра рӱдер, кидмастар-влак Надежда Акиева ден Людмила Матвеева палдареныт.

Тудым 31 январьыште марий рӱдолаште усталык коллектив-влакын концерт программышт дене тӱҥалме.
Нунын почеш сценыште шке мастарлыкыштым республикысе марий, руш да татар рӱдер-влакын вокал да фольклор, посна мурызо-влак ончыктеныт. Концерт тӱрлӧ ийготан, тӱрлӧ калык гыч лекше ӱдыр-рвезе-влакым ушен. Тудым Кугу Ачамланде сарыште кредалше землякна-влакын да сарын йочаже-влакын возымо серыш негызеш чоҥымо, темылан келшыше сылне почеламут дене сылнештарыме.
Марий тӱвыра рӱдер пеленсе коллектив-влакын выступленийышт темылан да жаплан келшыше репертуар дене пойдарыме лийын. «Чон оҥгыр» фольклор ансамбльын «Рекрут мурыжо» ачам, пелашым да йӧратыме рвезым армийыш (сарыш) ужатыме сценке дене сӧрастарыме.

Вуйлатыше да мурызо Ирина Якаеван «Олмапу» мурыжым Мария Ильина ден Василий Кириллов куштымашышт дене пойдареныт.

Тыгак «Падыраш» фольклор ансамбльын, «Йоча йӱк-йӱан» вокал студийын, самырык мурызо Артем Ягодаровын сылнын муралтымышт, «Рвезылык» ансамбльын куштымашыже концерт программым моткоч пойдареныт.

Тиде мероприятий тыныслык да калык-влак кокласе келшымаш улмылан верч Кугу Ачамланде сарыште патырлыкым ончыктышо тукымлан тауштен илышаш, ончыкшымат тӱняште тыныс лийже манын, кызытсе пуламыр пагытыште Шочмо элнан тичмашлыкше верч пеҥгыдын шогышо салтак-влаклан кертмына семын полшышаш улына, манын ушештара.
«Сеҥымаш тулсавыш» фестиваль умбакыже шуйна: 1 февральыште Оршанке ден Шернур район-влакын отчет концертышт лийын. Февраль-мартыште, кажне каныш кечын, район-влак шке мастарлыкыштым ончыкташ тӱҥалыт. А гала-концерт 7 майыште лиеш.