250 наре йоча толшаш. Нуным весела пайрем вуча. У ий йоча пайремыш кузе логалаш лиеш? Спискым районласе туныктыш пӧлкалаште ыштат, кажне район гыч 8 тунемше лиеш. Марий йылмым палыше, тӱрлӧ кӱкшытан мероприятийлаште сеҥышыш лекше 6 ияш гыч 15 ияш марте ийготан тунемше-влакым вучена. Тиде спискыш спецоперацийыште улшо еҥ-влакын йочашт лийшаш.

Тыгак моло тунемше-влакат елкыш толын кертыт. Тидлан Марий тӱвыра рӱдерын увертарыме «У ий дене!» этнооткрытке, спецоперацийыште улшо-влак лӱмеш «У ий саламлымаш» видеосаламлымаш да «Йӱштӧ кугызалан серыш» конкурслаш ушнен, сеҥыше радамыш логалман ыле..

Чумыржо 107 йодмаш пурен. Марий тӱсан открыткым 49 йоча сӱретлен колтен. СВО-што улшо-влакым 30 видеосаламлымаш пурен. Йоча-влак шкетынат, тӱшканат нунылан тыланымаш шомакым ойлат, гармонь дене шокталтен мурат, куштат. Йӱштӧ кугызалан серышым 27 йоча возен. Сеҥыше-влак марий елкыш ӱжмашым налыт. Марий У ий пайремыш йоча-влакым марий вургем, у ий костюм дене вучена.

Марий тӱвыра рӱдер марий йомакын геройжо-влакын У ий пайремыш кайышыштла тӱрлӧ томашаш логалмышт нерген интермедийым ямдыленыт. А Курчак театрын артистше-влак В.Сутеевын «Елка» йомакше почеш «Снеговик-почтовик» у ий ретро-йомак дене куандарат.