Марий калыкын ик эн йӧратыме Ӱярня пайремже лишемеш. Республикысе марий тӱвыра рӱдер йоча-влаклан «Ӱярня» пайремым 1 мартыште Шернур районышто, Йӱштӧ кугызан илемыштыже, эртара.
Мероприятий марий йылме дене эрташ тӱҥалеш. «Ӱярня» йоча пайрем 11 шагатлан тӱҥалеш. Кажне командыште 5-11 класслаште тунемше 6 йоча лийшаш улыт.
Республикысе школла гыч толшо тунемше-влак коклаште «Чевер Ӱярня» конкурс эрта. Тудо кум заданий гыч шога:
– «Ӱярня мелна»: кочкышын вужгата да тамле улмыжо, эн моторын сӧрастарыме деч посна марий кочкыш нерген оҥайын каласкален моштымо аклалтеш;
– «Ӱярня кува», пайремын символжо, тыгайрак лийшаш: ик метр деч кужурак, лӱдыкшӧ деч кораҥме технике правил почеш «йолжо» пеҥгыдын шогышаш. Тыгак символ нерген 7 минут наре жапыште каласкален моштымо аклалтеш;
– «Ӱярня» такмак таҥӱчаш вӱдышын каласыме мут-влак гыч такмакым шонен муралташ кӱлеш.
Тошто марий пайремын ю виян шӱлышыжым йоча-влак уремыште тӱрлӧ марий модмаш гоч пален налыт. «Шукыйол», «маскайол» дене таҥасаш тӱҥалыт, курык гыч ӱярнявара дене мунчалтат, калык модыш-влак дене модыт.
Конкурслаште сеҥыше-влак диплом да шергакан приз дене палемдалтыт.
Мероприятийым Марий тӱвыра рӱдер 2015 ий гыч эртара. Калык пайрем нерген йоча-влакын шинчымашыштым кумдаҥдаш, нунын усталыкыштым шуараш, школ ден тӱвыра тӧнеж-влакын самырык тукымым кугезына-влакын пайрем радамыштым пагалаш мероприятий виктаралтын.