13 район да кок ола гыч 250 ача-авашт да туныктышышт-влак дене пырля У ий пайремыш погыненыт. Ийготышт шот дене 6 гыч 15 ияш марте лийыныт.
Нуно – марий йӱланам да йылмынам аклен кушшо алмаштышна улыт манаш лиеш. Школ, район да республик кӱкшытыштӧ эртаралтше мероприятийлаште чолгалыкым ончыктеныт, тӱрлӧ конкурсышто сеҥышыш лектыныт.
Виктер вуйлатышын алмаштышыже Евгений Кузьмин йоча-влакым саламлен, тунеммаште да илышыште сай кӱкшытыш шуаш, чолга, ача-авалан, эллан ӱшанле лийын кушкаш тыланен.
Театрын омсаже воктенак йоча-влакым студент-аниматор-влак марла саламлалтын вашлийыныт. Тӱвыра тӧнеж пайремлан чотак ямдылалтын: кажне лукышто спектакльысе сюжет-влакым ушештарыше фотозоным шогалтыме. Йоча-влак, марий вургемыштым да у ий сӧрастарышым чиен, шкетынат, тӱшканат войзалтыныт.
Пайремлан Марий тӱвыра рӱдерын пашаеҥже-влакын ямдылыме интермедий ыштен. Муро, круг дене куштымаш, марий йомак-влак дене пырля Йӱштӧ кугыза да Лум ӱдырын пайремыш толмыштым куанен вашлиймаш – чылажат икшыве-влаклан сай шарнымашеш кодеш. Республикынан Виктер вуйлатышын лӱм дене Йӱштӧ кугыза Лум ӱдыр уныкаже да полышкалыше аниматор-влак дене пырля кажне йочалан шере йокмам кучыктеныт. Южо икшывыже Йӱштӧ кочалан почеламутым лудын.
Курчак театрын артистше-влак «Снеговик-почтовик» ретро-йомакым ончыктеныт. Спектакль деч вара «Весела У ий пайрем» республикысе марий ёлко кышкарыште 6 гыч 15 ияш марте йоча-влак коклаште «У ий дене!» этнооткрытке, СВО-што улшо землякна-влакым «У ий саламлымаш» видеороликым войзымаш, «Йӱштӧ Кугызалан серыш» конкурслаште сеҥыше-влакым палемдыме. Кажнылан дипломым да сертификатым кучыктымо.
