21 февральыште Шочмо йылмын тӱнямбал кечыжым палемдена. Йылме — тӱнямбалне илыше кажне калыкын поянлыкше, шке шотан улмыжым ончыктышо пале.
Марий тӱвыра рӱдер тиде кечылан икмыняр мероприятийым эртара. Нуным кок ужашлан шелаш лиеш: марий кундемыште илыше чыла калыкым марий йылме деке шӱмаҥдымаш да кокымшо – вес калыкын йылме да тӱвыра дене палдарыше мероприятий-влак.
13 февральыште кокымшо гана «Шочмо йылме – калык поянлык» йоча да самырык-влаклан фестиваль эртаралтеш. Тений тудо Морко районысо Кокласола лицейыште лиеш. Программым ончалына гын, фестиваль пайремлын почмаш дене тӱҥалеш. Вара кандаш классыште урок-влак лийыт. Тудым Марий Элыште кумдан палыме туныктышо-влак эртарат. Лӱмыштым палемденак кодем: Аркадьева Нина Вениаминовна, Кокласола школ, Григорьева Елена Валерияновна, Шӱргыял школ, Марий Элын калык туныктышыжо Софья Васильевна Никитина, Морко поселкысо 1-ше номеран школ, педагогике шанче кандидат, Марий Элын образованийын сулло пашаеҥже Иксанова Лидия Геннадьевна, Йошкар-Оласе тӧнежлаште марий йылмым туныктышо-влак Петрова Эльвира Владимировна ден Дмитриева Эльвира Николаевна. Нуно тӱрлӧ темым ойрен налыныт: ача-ава ден йоча кокласе проблеме, самырык тукым нерген, марий сылнымутым лончылымаш да тулеч молат.
Калык писатель Зоя Дудина лицейысе юнкор-влак дене С. Чавайнын калык пӱрымаш нерген «Ото» почеламутшым лончылат. Иктешлымаш лиеш, изирак концерт дене школын да рӱдерын усталык коллективше-влак выступатлат.
Вес калык гыч лекше-влакын марий йылмым тунемаш шонымыштым сайлан шотлен, Марий рӱдер марий йылме курсым почеш. Тудо Калык тӱвыра пӧртыштӧ эртаралтеш. Занятий 24 февраль гыч тӱҥалеш. Кум тылзе шуйна, арняште кок гана эртаралтеш. Туныктышо-влак пале улыт: Лидия Иксанова ден Эльвира Дмитриева, шке чумырымо программышт почеш туныкташ тӱҥалыт. Курсыш возалтше улыт, йыҥгыртат. Ӱшанена, тиде проектат шке корныжым муэш, мыняр-гынат еҥлан пайдам конда.
Вес калыкын йылмыжым, тӱвыражым тунемаш кумылаҥме пагалымаш кумылым шочыкта. Тений районласе школлаш «Шочмо йылме – мыйын поянлыкем» урок-путешествий дене лектына. Тушто Российысе, Азийысе, Индий калык-влакын тӱвырашт, йӱлашт дене палдарат. 14 гыч 25 февраль марте тыгай урок Шернур, Оршанке, Марий Турек да Звенигово районласе школлаште эртат.
21 февральыште, Шочмо йылмын тӱнямбал кечынже, Марий кугыжаныш университет дене пырля «Лингва-территорий» йылме фестивальым эртарена. Тенийсе ойыртемже тыште – Юл кундемлаште илыше калык-влакын «Унам вашлийме йӱлам» ончыктымаш. Марий, татар, руш, чуваш да одо калык-влак унам кузе вашлийыныт, йӱлаште могай икгайлык да ойыртем уло – фестивальыш толшо-влак шке шинчашт дене ужыт, пылышышт дене колыт. Толза, вучена. Мероприятий Калыкле тӱвыра да калык кокласе кыл институтышто эрта. 12 шагатлан тӱҥалеш.