15 мартыште Йошкар-Олаште «Изи гармоньчо» конкурс эртаралтеш.
Таче кече марте 11 йодмаш пурен: 10 – гармоньым шкет шоктышо, икте – семӱзгарым шоктышо коллектив деч. Кум регион – Пошкырт, Татарстан да Марий Эл – ушнат.
Самырык гармоньчо-влак, йодмашым пуаш кок кече веле кодын: 5 март йотке музыканче-влакын таҥӱчашыш ушнышо-влак ушнаш кумылышт нерген йодмашым колтен шуктышаш улыт. Тудым mari-centr_konkurs@mail.ru электрон адрес дене вучена. Лекше йодышым 8(8362) 45-88-51 телефон дене рашемдаш лиеш.
Ик участникше дене палдарена: тиде Шернур район Кукнур кыдалаш школын тунемшыже Кирилл Новоселов. Тудо шке усталыкше дене республик кӱкшытан «Йоча Ӱярня» пайремыште ойыртемалте: конкурсыш ушнышо школласе тунемше-влаклан аккомпаниатор семын моткоч кугу полышым пуыш. Теве Марий Турек районысо Марий Купта школын тунемшыже-влак Кириллын шоктымыжо почеш «Ӱярня мелна» презентаций годым мурым муралтышт.
Ушештарена:
Эн тале да мастар, гран-прим сеҥен налше гармоньчым ГАРМОНЬ вуча! Семӱзгарым шоктышо самырык йолташна-влак! Конкурсыш ушнаш вашкыза, тыгай шергакан пӧлек ТЕНДАН лийын кертеш.
Тидлан кок сомылым ыштыман:
1. 5 март марте mari-centr_konkurs@mail.ru электрон адресыш йодмашым возыман;
2. Кок номерым ямдылыман: конкурслан да гала-концертыште йоҥгалтараш.
Тыгак конкурсыш ушнышо-влак оргвзносым тӱлышаш улыт:
— шкет шоктышо – 700 теҥге;
— коллектив – 1000 теҥге.
Фестиваль-конкурсым Марий тӱвыра рӱдер эртара.