1 мартыште Шернур район Кукнур кундем «Йоча Ӱярня» республикысе пайремыш толшо уна-влакым шокшын вашлийын.
А унаже Шернур, Марий Турек, Куженер, Параньга, Советский, У Торъял районласе 12 школ гыч тунемше ден туныктышо, Шернур районысо тӧнежым вуйлатыше-влак лийыныт. Йоча-влакым пайрем дене Марий тӱвыра рӱдерым вуйлатыше Ирина Якаева, Шернур районысо туныктымо да самырык-влак дене пашам ыштыше пӧлкам вуйлатыше Татьяна Лебедева
Пайрем кышкарыште «Чевер Ӱярня» конкурс эртен. Верысе школышто йоча-влак «Ӱярня мелна», «Ӱярня такмак-влак» заданий-влакым шуктеныт, «Марий кочкыш» ончер тӱрлӧ сийлан поян лийын, кажне школын командыже кундемыштлан келшыше кочкышым темленыт.
Конкурсын «Ӱярня кува» заданийым йоча-влак Йӱштӧ кугызан резиденцийыште ыштеныт. Ончычшо йоча-влакым Йӱштӧ кугыза ден лумӱдыр, Ӱярня саламленыт, поро тыланымашым ойленыт.
Модыш алан Ӱярня пайрем годым эртарыме модыш-влаклан поян лийын: вӱдвара дене вӱдым, салмавондо дене «мелнам» ӱчашен нумалыныт, маскайол дене кошташ, шӱшканъече дене тӱшкан мунчалтеныт, «карта паҥгала» модыныт, кандырам шупшыныт. Резиденцийыште верланыше курыкышто чон канен мунчалтеныт. Корем тайылеш пыштыме ӱярнявараште мужыр дене шогалын мунчалтен волаш йоча-влаклан моткоч келшен.


Конкурс-влакым иктешлыме деч вара рашемын: эн виян команде – Параньга район Матародо кыдалаш школын «Кечыйол» командыже, икымше вер дене палемдалтын.

2-шо верыш Шернур район Марисола кыдалаш школын «Шож мелна» командыже лектын.

3-шо верыште – У Торъял кыдалаш школын Ӱярня – тукым пашма» командыже.

Усталык таҥасымашыште Куженер район гыч Руш Шой кыдалаш школын «Асталче», Шорсола тӱҥ школын «Ӱярня» командышт ушненыт. Советский район Кужмара тӱҥ школ гыч «Арава» команде толын. Б.Р. Ахматьянов лӱмеш Параньга кыдалаш школын «Ӱярня йор-йор» да Кугу Пумарий кыдалаш школын «Самырык тукым» командышт чолгалыкым ончыктеныт. Марий Турек районын чапшым Марий Купто школ гыч «Чевер Ӱярня» да Сардаял школын «Сардай тукым» командышт араленыт. Шернур район кум командым колтен: Кукнур кыдалаш школын «ВийАр» да Лажъял кыдалаш школын «Лумпеледыш».
Сеҥыше-влакым диплом, участник-влакым таумут да шергакан пӧлек дене палемдыме.