12 мартыште «Кичиер» санаторийыш Марий тӱвыра рӱдерын усталык коллективше-влак «Шӱм-чонна дене пеленда улына» концерт программе дене толыныт.
Тиде каныме да тазалыкым пеҥгыдемдыме верыште посна сарзе операцийыште улшо участник-влакын авашт але пелашыштлан пырля каналташ йӧным ыштыме.
«Чон оҥгыр» фольклор, «Падыраш» йоча ансамбль-влакын выступленийышт калыклан моткоч келшен. Нине коллектив-влакым Марий Элын тӱвыран сулло пашаеҥже Эльвира Петрова вуйлата. Йоча ансамбльын участникше-влак туныктышышт семынак тӱмырымат чаплын кырат, гармонь денат шоктен-мурен кертыт. Теве Богдан Тымбаршев ден Артем Ягодаров гармоньым ансамбльыш толмо годсек йӧратен шынденыт, тунем шуыныт, гармоньчо семын тӱрлӧ конкурсышто вийыштым тергат. А Кирилл Куклин ден Рамзан Килпинэн тӱмырым моткоч мастарын пералтат. Рвезе-влакын кажне выступленийыштым ончаш толшо-влак совым кырен вашлийыныт.
Данила Коротков марий рэпыште шкенжым кычалеш, мурыжо-влак шкешотан улыт.
Рӱдерын вуйлатышыже Ирина Якаева, элна верч пеҥгыдын шогышо салтак-влакын авашт ден пелашыштлан тауштен ойлен, мурсемым пӧлеклен.
А. А. Андреева, Ачамланде сарзе еш-влакын Волжский районысо муниципал штабым вуйлатыше:
— Марий тӱвыра рӱдерын эртарыме концерт мемнан составлан келшыше. Тыште шукынжо ава-влак улыт. Нунылан эргышт нерген шарнымашым кондышо программым ямдылыме. Репертуар пеҥгыде, ӱшаным пуышо. Чылалан тазалыкым тыланем.